Saudiya Arabistonida 12-mart, shanba kuni 81 kishiga nisbatan o‘lim jazosi ijro etildi. Bu butun 2021-yil davomida qatl qilinganlar sonidan ko‘p. O‘tgan yili mamlakatda 69 kishiga oliy jazo qo‘llangandi.
Ma’lum bo‘lishicha, qatl etilganlarning barchasi terrorchilikda ayblangan. Ular IShID, “Al-Qoida” va boshqa terrorchilik tashkilotlariga aloqador bo‘lgan va mamlakat sudlari tomonidan allaqachon “bir qancha jirkanch jinoyatlar”da aybdor deb topilgan. Qatl etilganlar orasida 73 nafar saudiyalik, 7 nafar yamanlik va bir suriyalik bor.
O‘z navbatida, huquq himoyachilari qatllarni tanqid qildi.
“O‘tgan haftada valiahd shahzoda (Muhammad bin Salmon al-Saud – tahr.) jurnalistlarga Saudiya jinoiy sudlov tizimini modernizatsiya qilmoqchi ekanini aytgandi, ammo keyin mamlakat tarixidagi eng yirik ommaviy qatlni buyurdi”, — deydi Buyuk Britaniyada joylashgan Reprieve inson huquqlari guruhi.
AFP agentligi hisob-kitoblariga ko‘ra, Saudiya Arabistonida 2022-yil boshidan 11-martgacha qatl etilganlarning umumiy soni 11 kishiga yetgan. Saudiya Arabistoni so‘nggi yillarda bir qator jinoiy islohotlar, jumladan, giyohvand moddalar bilan bog‘liq jinoyatlar uchun o‘lim jazosiga moratoriy va jazo turi sifatida kaltaklashning bekor qilinishi haqida e’lon qilgandi. 2020-yil aprel oyida qirollik 18 yoshga to‘lmagan ayblanuvchilar uchun ham o‘lim jazosini bekor qilgandi.
Avvalroq Kongoda harbiy tribunal 2017-yilning mart oyida BMTning ikki xodimini o‘ldirganlikda ayblangan 51 kishini o‘limga hukm qilgandi. 2017-yilda BMT ekspertlari — Shvetsiya fuqarosi Zayda Katalan va AQSh fuqarosi Maykl Sharp xizmat faoliyati vaqtida bedarak yo‘qolgan. Ikki hafta o‘tgach, ularning jasadi topilgan.
Izoh (0)