Italiya kompaniyasi tomonidan O‘zbekistonda texnologiyalar transferini ishlab chiqish va amalga oshirishga 1 million yevrodan ortiq sarmoya kiritish rejalashtirilmoqda. Bu haqda Oliy taʼlim, fan va innovatsiyalar vazirligi axborot xizmati xabar berdi.
Xabarga ko‘ra, 24-aprel kuni Innoprom-2023 doirasida Oliy taʼlim, fan va innovatsiyalar huzuridagi Innovatsion rivojlanish agentligi ko‘magida Illogic (Italiya) va Mind as Engine (O‘zbekiston) o‘rtasida hamkorlik to‘g‘risidagi memorandum imzolandi. Mazkur hamkorlik bitimi sanoatning samaradorligi va xavfsizligini oshirishga qaratilgan.
MyDigitalHelmet – dasturiy-apparat majmuasi, video va audiokontent oqimidan foydalangan holda operatorlarga masofaviy yordam ko‘rsatish imkonini beruvchi “aqlli” dubulg‘a hisoblanadi. Qurilma xodimlarni masofaviy malaka markaziga ulaydi hamda ularga real vaqt rejimida axborot almashish imkonini beradi.
Bundan tashqari, hamkorlikning asosiy maqsadlari texnologiyalar transferini amalga oshirish, sunʼiy intellekt va raqamlashtirish sohasida qo‘shma tadqiqotlar o‘tkazish va MyDigitalHelmet joriy qilish va uni Markaziy Osiyo bozoriga tatbiq etishdan iborat. Mind as Engine boshqaruvi raisi Elmurod Rasulmuhamedovning maʼlum qilishicha, O‘zbekistonda texnologiyalar transferini ishlab chiqish va amalga oshirishga 1 million yevrodan ortiq sarmoya kiritish rejalashtirilmoqda.
“Innovatsiyalarni rivojlantirish mamlakat taraqqiyotining eng muhim omillaridan biridir. Innovatsiyalarda texnologiyalar transferi alohida o‘rin tutadi. Birinchidan, texnologiyalar transferini rivojlantirish tufayli O‘zbekiston Respublikasi hududida yangi texnologik ishlab chiqarish quvvatlari paydo bo‘ladi. Ikkinchidan, bu mintaqaga to‘g‘ridan-to‘g‘ri investitsiyalar oqimini shakllantiradi, uchinchidan, bu yangi texnologik kompaniyalarning shakllanishi demakdir. Buning isboti sifatida yangi yuqori texnologiyali ish o‘rinlari yaratilmoqda va buning natijasida ichki bozorga yo‘naltirilgan, shuningdek eksportda ham talabga ega bo‘ladigan mahsulot ishlab chiqarilmoqda”, — deya xulosa qildi Innovatsion rivojlanish agentligi vakili Jamoliddin Babaxonov.
Izoh (0)