“Chelsi” keyingi bosh murabbiy borasida bir qarorga keldi

“Tottenhem” va “PSJ” jamoalari sobiq ustozi Maurisio Pochettino “Chelsi” bosh murabbiyiga aylanishi mumkin.

Italiyalik insayder Fabrisio Romanoga ko‘ra, tomonlar shartnomaning oxirgi detallarini muhokama qilmoqda. Tomonlar o‘rtasidagi muzokara hozircha yaxshi o‘tyapti. Ular dushanba kuni London klubining loyihasini muhokama qilgan. “Chelsi” yaqin orada mutaxassis bilan kelishuvga erishadi.

“Ko‘klar” rahbariyati Frenk Lempardga mavsum oxirigacha ishlash imkonini beradi, keyin esa boshqaruvga Pochettino keladi, deya xabar qilgan ESPN. Avvalroq Pochettino o‘z yordamchilariga “Chelsi”ga o‘tishga yaqin ekanini aytgani xabar qilingandi.

The Telegraph nashrida e’lon qilingan xabarda aytilishicha, “Chelsi” futbolchilari argentinalik mutaxassisni olib kelish variantini qo‘llab-quvvatlagan.

“Chelsi” mavsumni Tomas Tuxel qo‘l ostida boshlagandi. Sentabr oyi boshida uning o‘rnini Grem Potter egalladi. Ketma-ket qoniqarsiz natijalardan keyin Potter aprel oyi boshida iste’foga chiqarildi.

Eslatib o‘tamiz, Rossiyaning Ukrainaga bostirib kirishi oqibatida “Chelsi”ning avvalgi egasi Roman Abramovich klubni sotib yuborishga majbur bo‘ldi. 2022-yilning may oyida klub amerikaliklar qo‘liga o‘tdi. Ayni vaqtda London jamoasiga Tod Bouli egali qilmoqda.