“Челси” кейинги бош мураббий борасида бир қарорга келди

“Тоттенҳэм” ва “ПСЖ” жамоалари собиқ устози Маурисио Почеттино “Челси” бош мураббийига айланиши мумкин.

Италиялик инсайдер Фабрицио Романога кўра, томонлар шартноманинг охирги деталларини муҳокама қилмоқда. Томонлар ўртасидаги музокара ҳозирча яхши ўтяпти. Улар душанба куни Лондон клубининг лойиҳасини муҳокама қилган. “Челси” яқин орада мутахассис билан келишувга эришади.

“Кўклар” раҳбарияти Фрэнк Лэмпардга мавсум охиригача ишлаш имконини беради, кейин эса бошқарувга Почеттино келади, дея хабар қилган ESPN. Аввалроқ Почеттино ўз ёрдамчиларига “Челси”га ўтишга яқин эканини айтгани хабар қилинганди.

The Telegraph нашрида эълон қилинган хабарда айтилишича, “Челси” футболчилари аргентиналик мутахассисни олиб келиш вариантини қўллаб-қувватлаган.

“Челси” мавсумни Томас Тухель қўл остида бошлаганди. Сентябрь ойи бошида унинг ўрнини Грем Поттер эгаллади. Кетма-кет қониқарсиз натижалардан кейин Поттер апрель ойи бошида истеъфога чиқарилди.

Эслатиб ўтамиз, Россиянинг Украинага бостириб кириши оқибатида “Челси”нинг аввалги эгаси Роман Абрамович клубни сотиб юборишга мажбур бўлди. 2022 йилнинг май ойида клуб америкаликлар қўлига ўтди. Айни вақтда Лондон жамоасига Тод Боули эгали қилмоқда.