“Real” uchun eng noqulay raqib, 76 yillik an’anani buzgan argentinalik. “Jirona” — “Real” o‘yiniga oid raqam va faktlar

Madridning “Real” klubi Ispaniya La Ligasi 31-turidan o‘rin olgan o‘yinda “Jirona”ga mag‘lub bo‘ldi.

Uchrashuvga oid raqamlar va faktlar

“Real Madrid” XXI asrda birinchi marta La Liga doirasida bir futbolchidan to‘rtta gol o‘tkazib yubordi. “Jirona” hujumchisi Valentin Kastelyanos “qaymoqranglilar”ga qarshi o‘yinda poker qayd etdi. Bungacha chempionatda 76 yil davomida hech qaysi futbolchi “Real” darvozasiga bir o‘yinda to‘rtta gol kiritmagandi.

“Qirollik klubi”ning butun tarixi davomida barcha turnirlarda faqatgina 9 nafar futbolchi jamoaga qarshi o‘yinda poker qayd eta olgan edi. Kastelyanos “Real” darvozasiga 4 ta gol urgan o‘ninchi futbolchi bo‘ldi.

• 1926-yil — Xosep Samityer, “Barselona” — Ispaniya kubogi;
• 1929 -yil — Karlos Bestit, “Yevropa” — Ispaniya chempionati;
• 1935-yil — Karlos Vantolra, "Barselona" — Ispaniya chempionati;
• 1940-yil — Martines Katala, “Ovyedo” — Ispaniya chempionati;
• 1944-yil — Amilin, “Ovyedo” — Ispaniya chempionati;
• 1947-yil — Esteban Echevarriya, “Ovyedo” (yagona penta-trik) — Ispaniya chempionati;
• 1957-yil — Eulogio Martines, “Barselona” — Ispaniya Kubogi;
• 2006-yil — Diyego Milito, “Saragosa” — Ispaniya kubogi;
• 2013-yil — Robert Levandovski, “Borussiya D” — Chempionlar Ligasi;
• 2023-yil — Valentin Kastelyanos, “Jirona” — Ispaniya chempionati.

“Jirona” La Liga tarixida “Real”ga qarshi o‘yinlarda g‘alaba foiz ko‘rsatkichi (50%) bo‘yicha eng yaxshi natija qayd etgan jamoa bo‘lib turibdi. O‘zaro oltita o‘yinning 3 tasida katalonlarning qo‘li baland kelgan, bir o‘yin durang bilan yakun topgan, ikkitasida “Real” yutgan.

“Real Madrid” futbolchisi Vinisius Junior klubdagi faoliyati davomida birinchi marta qatorasiga 7 ta o‘yinda samarali harakat (3 gol, 6 assist) amalga oshirdi.

“Real Madrid” darvozaboni Andrey Lunin 2022/23-yilgi mavsumda jamoa safida barcha turnirlardagi 12-uchrashuvini o‘tkazdi. Madrid klubi ularning ikkitasida mag‘lub bo‘ldi.

“Jirona” safida poker qayd etgan argentinalik Kastelyanos butun uchrashuv davomida bor yo‘g‘i 4 marta uzatma amalga oshirdi.