UEFA “Yuventus” jamoasini Yevrokuboklardan chetlatishi mumkin. Bu haqda La Gazzetta dello Sport xabar berdi.
“Yuventus” futbolchilarning transfer narxini oshirib ko‘rsatganlikda, shuningdek, xodimlarning xarajatlari haqidagi ma’lumotlarni va futbolchilar maoshining haqiqiy hajmini yashirganlikda ayblangan. Shu bois 2023-yilning yanvar oyida A Seriya doirasida klubdan 15 ochko olib qo‘yilgandi. Aprel oyida esa jamoaga ochkolar qaytarildi. Italiya futbol federatsiyasining federal apellyatsiya sudi (FIGC) ishni qayta ko‘rib chiqishi lozim.
Xabarlarga ko‘ra, agar bu ish bo‘yicha yakuniy qaror yaqin oylarda chiqarilmasa UEFA “Yuventus”ni Yevrokuboklardan chetlatishi mumkin. Turin klubi kamida 1 yilga xalqaro musobaqalardan chetlatiladi. Yevropa Ligasidagi ehtimoliy g‘alaba diskvalifikatsiyadan qutulib qolishga yordam bermaydi, biroq uzoq muddatli chetlatishdan saqlab qolishi mumkin.
Agar diskvalifikatsiya bo‘yicha qaror qabul qilinsa-yu, lekin “Yuventus” Yevrokuboklarga yo‘llanma beradigan o‘rinni egallay olmasa, chetlatish bir mavsumga qoldiriladi. “Yuventus” xalqaro maydondagi musobaqalarda ishtirok etish uchun yo‘llanmani qo‘lga kiritgan vaqtda amal qiladi.
UEFA YCHL-2023 finali o‘tkaziladigan 10-iyundan keyin Chempionlari Ligasi, Yevropa Ligasi va Konferensiyalar Ligasining keyingi mavsum ishtirokchilarining ro‘yxatini tuzishi kerak. “Yuventus” ariza berishi uchun iyulning oxiri yoki avgustning boshigacha vaqt berilishi mumkin.
UEFA parallel ravishda “Yuventus”ning moliyaviy firibgarliklari bo‘yicha surishtiruv o‘tkazmoqda. Tashkilot Turin prokuraturasidan barcha hujjatlarni olgan va ularni o‘rganib chiqmoqda. UEFA bu ish bo‘yicha FIGC qarori iyun oyi oxirigacha e’lon qilinishiga umid qilmoqda.
Agar qaror yangi Yevrokuboklar mavsumi boshlanguniga qadar chiqarilmasa, “Yuventus”ning xalqaro maydondagi ishtiroki UEFA’ning halol o‘yin bo‘yicha komissiyasi tomonidan ko‘rib chiqiladi.
Eslatib o‘tamiz, 2022-yilning noyabrida moliyaviy ayblovlar ortidan “Yuventus” rahbariyati iste’fo bergandi. Yanvar oyida esa klubning sobiq prezidenti Andrea Anyelli va bosh direktor Maurisio Arrivabene 2 yilga, sobiq vitse-prezident Pavel Nedved 8 oyga, Fabio Paratichi esa 2,5 yilga futboldan chetlatilgan.
Izoh (0)