АҚШнинг Демократик ва Республикачи партиялари конгрессменлари АҚШ Конгресси Вакиллар палатасига Украинадаги урушни мамлакат 1991 йилги чегараларига қайтиши билан якунлашни талаб қилувчи резолюцияни киритди, деб хабар бермоқда Yahoo News.
Ҳужжатда айтилишича, “АҚШ сиёсати шундан иборатки, Украина босқинни енгиб, 1991 йилги халқаро тан олинган чегараларини тиклаши керак”, яъни Россия томонидан аннексия қилинган Қрим ва бошқа ҳудудлар қайтариб олиниши зарур.
Резолюция, шунингдек, Украинани НАТОга қўшишга чақиради. Бундан ташқари, ҳужжатда Россия товон пули тўлаши, Кремль расмийлари эса ҳарбий жиноятлар учун судга тортилиши кераклиги айтилади.
Ҳужжат Конгресснинг “Хелсинки комиссияси” (ушбу комиссия 1976 йилда СССРга халқаро шартномаларга риоя қилишда ёрдам бериш учун тузилган. Совет Иттифоқи парчаланганидан кейин комиссия Россия масалалари билан шуғулланмоқда) аъзолари бўлган республикачи Жо Уилсон ва демократ Стив Коэн томонидан тайёрланган. Ҳужжат Вакиллар палатасида овозга қўйилишидан олдин Вакиллар палатасининг Ташқи ишлар қўмитасида кўриб чиқилади.
“Хелсинки комиссияси” ҳисоботида айтилишича, 25 апрель куни Капитолий яқинида Украинанинг ўнлаб тарафдорлари йиғилган ва улар резолюциянинг Конгрессга киритилишини олқишлаган. Конгресс биноси ёнига келганлар орасида Украинанинг учинчи президенти Виктор Юшенко ҳам бор эди.
Today, @RepJoeWilson, @RepCohen, @RepMarcyKaptur welcomed dozens of #Ukraine supporters to the Capitol to mark the introduction of the Ukrainian Victory Resolution. Special thanks to former President of Ukraine Yushchenko & @razomforukraine. pic.twitter.com/pIPHIo9UOu
— U.S. Helsinki Commission (@HelsinkiComm) April 25, 2023
“Биз 1939 йил 1 сентябрдаги хатони такрорламаслигимиз керак”, — деди резолюция ҳомийси Жо Уилсон Адолф Гитлер Польшага бостириб кирганига ишора қилиб.
Украина президенти офиси раҳбарининг маслаҳатчиси Михаил Подоляк резолюция киритилишини олқишлади. Yahoo News билан суҳбатда у ҳужжатни “ажойиб” деб атади. Украинанинг АҚШдаги элчиси Оксана Маркарова Facebook’да конгрессменларга “Украинага ёрдамни кучайтиришдаги етакчилиги ва икки партиянинг умумий ғалаба ҳақидаги қарашлари учун” миннатдорлик билдирди.
Изоҳ (0)