Andijonda o‘qituvchining dars soatlarini o‘z tanishlariga o‘tkazib bergan “zamdirektor” ishdan bo‘shatildi

Andijon viloyati Buloqboshi tumanida o‘qituvchining dars soatlarini o‘z tanishlariga o‘tkazib bergan “zamdirektor” ishdan bo‘shatildi. Bu haqda ombudsman axborot xizmati xabar berdi. 

Xabarga ko‘ra, Oliy Majlisning Inson huquqlari bo‘yicha vakili (ombudsman)ning Andijon viloyatidagi mintaqaviy vakili nomiga Buloqboshi tumanida yashovchi fuqaro O.Q.dan ish faoliyatida mehnat huquqlarining buzilayotgani bo‘yicha murojaat kelib tushgan. 

Ushbu tumandagi maktablardan birida matematika fani o‘qituvchisi sifatida faoliyat yuritadigan murojaatchi shu maktabning o‘quv-tarbiya ishlari bo‘yicha direktor o‘rinbosari ish boshlaganidan buyon yig‘ilishlarda uni obro‘sizlantirishga harakat qilib kelganini aytib o‘tgan. Shuningdek, unga bosim o‘tkazish orqali dars soatlarini o‘z tanishlariga o‘tkazib berganini taʼkidlagan. 

Qayd etilishicha, O.Q.ning murojaati nazoratga olinib, viloyat Xalq ta’limi boshqarmasi bilan birgalikda ishchi guruh tuzilgan holda o‘rganildi. O‘rganish davomida direktor o‘rinbosarining ish faoliyatida qator kamchiliklarga yo‘l qo‘yilgani aniqlanib, murojaatchidan qonunga zid ravishda olingan o‘quv soatlari o‘ziga qaytarildi. Bugungi kunda maktab direktori o‘rinbosari egallab turgan lavozimidan ozod etilgan.