Андижон вилояти Булоқбоши туманида ўқитувчининг дарс соатларини ўз танишларига ўтказиб берган “замдиректор” ишдан бўшатилди. Бу ҳақда омбудсман ахборот хизмати хабар берди.
Хабарга кўра, Олий Мажлиснинг Инсон ҳуқуқлари бўйича вакили (омбудсман)нинг Андижон вилоятидаги минтақавий вакили номига Булоқбоши туманида яшовчи фуқаро О.Қ.дан иш фаолиятида меҳнат ҳуқуқларининг бузилаётгани бўйича мурожаат келиб тушган.
Ушбу тумандаги мактаблардан бирида математика фани ўқитувчиси сифатида фаолият юритадиган мурожаатчи шу мактабнинг ўқув-тарбия ишлари бўйича директор ўринбосари иш бошлаганидан буён йиғилишларда уни обрўсизлантиришга ҳаракат қилиб келганини айтиб ўтган. Шунингдек, унга босим ўтказиш орқали дарс соатларини ўз танишларига ўтказиб берганини таъкидлаган.
Қайд этилишича, О.Қ.нинг мурожаати назоратга олиниб, вилоят Халқ таълими бошқармаси билан биргаликда ишчи гуруҳ тузилган ҳолда ўрганилди. Ўрганиш давомида директор ўринбосарининг иш фаолиятида қатор камчиликларга йўл қўйилгани аниқланиб, мурожаатчидан қонунга зид равишда олинган ўқув соатлари ўзига қайтарилди. Бугунги кунда мактаб директори ўринбосари эгаллаб турган лавозимидан озод этилган.
Изоҳ (0)