Қозоғистон Россиянинг “Вагнер” хусусий ҳарбий компаниясига қўшилган 23 ёшли қозоғистонлик талабани қайтаришга ёрдам беради. Аммо у ватанида жиноий жазога тортилади, деди Қозоғистон Ташқи ишлар вазирлиги расмий вакили Айбек Смадияров.
Аввалроқ ижтимоий тармоқлар ва оммавий ахборот воситаларида Томск давлат университетида таҳсил олган 23 ёшли Марғулон Б. гўёки ўғирлаб кетилгани ҳақида хабарлар тарқалганди. Таъкидланишича, Россияда у “Вагнер”га қўшилишга мажбурланган. Қозоғистон ТИВ эса йигит ўз ихтиёри билан ёлланма аскар бўлишга қарор қилганини аниқлади.
“Бориб ‘Вагнер’ сафига қўшилиш ниятида бўлган ёки буни ўйлаётган барча фуқароларни огоҳлантиришни истардикки, уларга беш йилдан тўққиз йилгача қамоқ жазоси берилиши мумкин. Бу Қозоғистонда жиноий жавобгарликка тортилади. Улар тасаввур қилган ҳеч қандай романтика йўқ. Айтмоқчиманки, йигитлар, бу сизнинг урушингиз эмас. Эҳтиёт бўлинг, оилангиз ҳақида ўйланг. Ҳаммангиз кап-катта одамсиз. Бу йигит ҳам вояга етган, қарорни ўзи қилган”, — дейди Айбек Смадияров.
Қозоғистон ТИВ спикери вазирлик талабанинг қариндошлари билан алоқада бўлганини ва барча тегишли сўровларни Россиянинг ваколатли органларига юборганини эслатди. Ташқи ишлар вазирлиги имкон қадар фуқарога ҳар томонлама ёрдам кўрсатади, жумладан, зарурат бўлса йигит ватанига қайтганида ҳам кўмак берилади.
“Аммо шуни ҳисобга олиш керакки, у Қозоғистонга қайтганида жиноий жавобгарликка тортилади”, — дея қўшимча қилди Айбек Смадияров.
Маълумот учун “Вагнер” ёлланма жангчилари ҳозирда Украина ҳудудидаги ҳарбий ҳаракатларда Россия томонидан фаол иштирок этмоқда.
Изоҳ (0)