Belarus ozodligi Ukrainaning Rossiya bilan urushda g‘alaba qozonishining zaruriy shartidir, chunki Ukraina va Belarus taqdiri bir-biri bilan chambarchas bog‘liq. Bu haqda Belarus muxolifati yetakchisi Svetlana Tixanovskaya Berlindagi Nauman jamg‘armasida “Ozodlik muhokamasi” nomli yillik tadbirida aytib o‘tdi.
“Ozod Ukrainasiz ozod Belarus bo‘lmaydi, ozod Belarussiz esa Ukraina xavfsiz bo‘lmaydi”, — dedi u. Tixanovskaya, shuningdek, Ukraina tomonida yuzlab belarus ko‘ngillilari jang qilayotganidan faxrlanishini ta’kidladi. Uning so‘zlariga ko‘ra, Rossiyaning rasmiy ittifoqchisi hisoblangan Belarusdan kamida 18 nafar ko‘ngilli Ukrainani himoya qilishda halok bo‘lgan.
Tixanovskaya Belarusdagi Rossiyaga qarshi partizanlik harakatlarini esladi. “Birgina 2022-yilda Belarus temiryo‘l partizanlari rus qo‘shinlarini to‘xtatish uchun 80 ta qo‘poruvchilik harakatlarini amalga oshirdi”, — dedi Belarus prezidentligiga sobiq nomzod. Uning so‘zlariga ko‘ra, “Rossiyaning genotsid urushini qo‘llab-quvvatlovchi (Aleksandr) Lukashenko rejimini ukrainaliklar bilan birgalikda jangari imperiyani daf etayotgan belarus xalqidan farqlash kerak”.
Tixanovskaya Belarusda 15 yilga ozodlikdan mahrum qilingan
Mart oyi boshida Minsk shahar sudi Tixanovskayani sirtdan 15 yillik qamoq jazosiga hukm qildi. Tergov unga bir vaqtning o‘zida o‘nta ayblov qo‘ydi: unvon va hokimiyatni ruxsatsiz tortib olish, milliy xavfsizlikka qarshi harakatlarda xorijiy davlatga yordam berish, hokimiyatni egallab olish uchun fitna uyushtirish, nafrat uyg‘otish, ekstremistik tuzilma yaratish, Markaziy saylov komissiyasi ishiga to‘sqinlik qilish va boshqalar.
Tixanovskayaning so‘zlariga ko‘ra, u Belarus hukumati bu hukm bilan unga nima demoqchi bo‘lgani haqida bosh qotirayotgani yo‘q. U “hukm bilan yoki usiz siyosiy mahbuslarni ozod qilish va mamlakatni demokratik o‘zgarishlar sari yetaklash uchun barcha imkoniyatlarni ishga solishda” davom etmoqchi.
Izoh (0)