АҚШ Украинанинг Шимолий Атлантика алянсига қўшилишини ёқлайди, фақат Киев Россия билан урушда ғалаба қозонганидан кейин. Бу ҳақда АҚШ Миллий хавфсизлик кенгашининг стратегик коммуникациялар бўйича координатори Жон Кирби “Америка Овози” радиосига берган интервьюсида маълум қилди.
Кирбининг сўзларига кўра, Украина учун НАТО эшиклари очиқлигича қолмоқда.
“Бу борада ҳеч нарса ўзгармаган. Биз НАТОнинг очиқ эшиклар сиёсатини сақлашда давом этамиз. Лекин алянсга қўшилиш ҳақидаги ҳар қандай муҳокамалар ушбу мамлакат ва НАТОнинг ўзи ўртасидаги суҳбат бўлиши лозимлигини ҳам айтганмиз”, — деди Кирби.
Унинг таъкидлашича, бугунги кунда алянс учун асосий масала Киевни рус босқинчиларига қарши курашда қўллаб-қувватлашдир.
“Ҳозир асосий эътибор Украинага жанг майдонида ғалаба қозонишига ёрдам беришга қаратилиши керак, шундагина улар музокаралар столида ҳам зафар қозониши мумкин. Биз ҳозир шу нарсага эътибор қаратмоқдамиз”, — деди Оқ уй матбуот котиби.
Июль ойида Вилнюсда НАТО саммити бўлиб ўтади. Алянснинг кўплаб аъзолари ушбу йиғилишда Украинага НАТОга қўшилиш бўйича “йўл харитаси”ни тақдим этиш тарафдори. Шу билан бирга АҚШ, Германия ва Венгрия бунга қарши эканини билдирган.
Изоҳ (0)