Checheniston rahbari Ramzan Qodirovning jiyani, 26 yoshli Hamzat Qodirov uning kuch blokidagi maslahatchi-yordamchisi bo‘ldi. Bu haqda Checheniston milliy siyosat, tashqi aloqalar, matbuot va axborot bo‘yicha vaziri Axmed Dudayev o‘zining Telegram-kanalida ma’lum qildi.
Dudayevning so‘zlariga ko‘ra, Hamzat Qodirovga ishonib topshirilgan har qanday yo‘nalish “dinamik rivojlanishni boshlaydi”. U, shuningdek, Hamzatni Ramzan Qodirovning “a’lo darajadagi ish boshqaruvchisi” va “sodiq ittifoqchisi” deb atadi.
Fevral oyi boshida Qodirov jiyani respublika mulk va yer munosabatlari vaziri, bosh vazir o‘rinbosari lavozimiga tayinlanganini ma’lum qilgandi. Uch yil oldin, o‘sha paytda 23 yoshda bo‘lgan Hamzat Qodirov Checheniston Sport vazirligini boshqargan.
Qarindoshlarining Checheniston hukumatiga tayinlanishiga izoh berar ekan, Qodirov shunday degan edi: “Qaysi muassasa va qaysi lavozimda bo‘lmasin, qarindoshlarimga o‘n barobar ko‘p talab qo‘yilgan, chunki ular menga rahmat aytish uchun emas, menga qaramay ishlayotganini isbotlashi kerak. Kimga ishonsam, shuni tayinlayman”.
BBC rus xizmatining 2018-yilgi hisob-kitoblariga ko‘ra, Chechenistondagi 158 nafar yuqori martabali amaldorning 30 foizi Ramzan Qodirovning qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir. 2021-yil oktabr oyida Qodirovning qizi Ayshat Checheniston madaniyat vaziri bo‘lgandi. O‘sha paytda u 22 yoshda edi.
Ma’lumot o‘rnida, Hamzat — Ramzan Qodirovning marhum akasi Zelimxon Qodirovning o‘g‘li.
Izoh (0)