O‘zbekiston tashqi savdosi yil boshidan beri qariyb 15 mlrd dollarga yetdi

2023-yil yanvar—mart oylarida O‘zbekistonning tashqi savdo aylanmasi 14,8 mlrd dollarga yetdi. Bu haqda Statistika agentligi xabar bermoqda. 

Bu ko‘rsatkich 2022-yilning mos davriga nisbatan 1,6 mlrd dollarga yoki 11,9 foizga ko‘paydi. Bunda eksport 2022-yilga nisbatan 2,6 foizga pasayib, 5,7 mlrd dollarni, import 23,4 foizga o‘sib, 9,1 mlrd dollarni tashkil qildi. 

Mart oyida mamlakat tashqi savdosida asosiy hamkor sifatida Xitoy Rossiyani ortda qoldirib, birinchi o‘ringa chiqib oldi. 

O‘zbekiston dunyoning 167 mamlakati bilan savdo aloqalarini amalga oshirgan. Yil boshidan beri mamlakat va Xitoy o‘rtasida 2,4 mlrd dollarlik savdo amalga oshirilgan. 2,2 mlrd dollarlik ko‘rsatkich bilan Rossiya ikkinchi o‘rinda. 

Tashqi savdo bo‘yicha 20 ta yirik hamkor-davlatlar orasidan faqat uchta davlatda ijobiy tashqi savdo balansi kuzatilgan. Bular — Afg‘oniston, Qirg‘iz Respublikasi va Tojikiston. 

Hududlar kesimida eng ko‘p tashqi savdo aylanmasi Toshkent shahri, Toshkent va Andijon viloyatlari, eng kami esa Surxondaryo, Qoraqalpog‘iston va Qashqadaryo hissasiga to‘g‘ri kelmoqda. 

Shuningdek, yanvar—mart oylarida tashqi savdo aylanmasida MDH davlatlarining ulushi 32,3 foizni tashkil etib, tashqi savdo aylanmasidagi ulushi 2022- yilning mos davriga nisbatan 1,9 foizga ko‘paydi. Bu davrda boshqa xorijiy davlatlar bilan tashqi savdo esa 1,9 foizga kamaygan.