2023 йил январь—март ойларида Ўзбекистоннинг ташқи савдо айланмаси 14,8 млрд долларга етди. Бу ҳақда Статистика агентлиги хабар бермоқда.
Бу кўрсаткич 2022 йилнинг мос даврига нисбатан 1,6 млрд долларга ёки 11,9 фоизга кўпайди. Бунда экспорт 2022 йилга нисбатан 2,6 фоизга пасайиб, 5,7 млрд долларни, импорт 23,4 фоизга ўсиб, 9,1 млрд долларни ташкил қилди.
Март ойида мамлакат ташқи савдосида асосий ҳамкор сифатида Хитой Россияни ортда қолдириб, биринчи ўринга чиқиб олди.
Ўзбекистон дунёнинг 167 мамлакати билан савдо алоқаларини амалга оширган. Йил бошидан бери мамлакат ва Хитой ўртасида 2,4 млрд долларлик савдо амалга оширилган. 2,2 млрд долларлик кўрсаткич билан Россия иккинчи ўринда.
Ташқи савдо бўйича 20 та йирик ҳамкор-давлатлар орасидан фақат учта давлатда ижобий ташқи савдо баланси кузатилган. Булар — Афғонистон, Қирғиз Республикаси ва Тожикистон.
Ҳудудлар кесимида энг кўп ташқи савдо айланмаси Тошкент шаҳри, Тошкент ва Андижон вилоятлари, энг ками эса Сурхондарё, Қорақалпоғистон ва Қашқадарё ҳиссасига тўғри келмоқда.
Шунингдек, январь—март ойларида ташқи савдо айланмасида МДҲ давлатларининг улуши 32,3 фоизни ташкил этиб, ташқи савдо айланмасидаги улуши 2022- йилнинг мос даврига нисбатан 1,9 фоизга кўпайди. Бу даврда бошқа хорижий давлатлар билан ташқи савдо эса 1,9 фоизга камайган.
Изоҳ (0)