O‘zbekistonda mart oyida avtomobil bozorida faollikning 0,1 foizlik pasayishi qayd etildi. Bu haqda “Review.uz” xabar bermoqda.
Umuman olganda, mart davomida jami 123,4 ming dona avtotransport vositasi sotilgan, bu bir oy avvalgidan 115 donaga kam.
Shu bilan birga, o‘tgan yilning shu davriga nisbatan sotuvlar 10 foizga oshdi.
Birlamchi va ikkilamchi avtomobil bozoridagi vaziyat
Mart oyida sotilgan yengil avtomobillar soni 4,7 foizga kamaydi va 110,8 mingtani tashkil etdi.
Mamlakatda sotuvlar bo‘yicha eng katta pasayish Navoiy — 22 foiz, Buxoro — 19 foiz va Qashqadaryo — 18 foiz viloyatlarida qayd etildi.
Shu bilan birga, 2022-yil mart oyiga nisbatan yengil avtomobillar savdosi 7,8 foizga oshdi.
Umuman olganda, joriy yilning birinchi choragi natijalariga ko‘ra 345,4 ming yengil avtomobil sotildi, yillik o‘sish 8,5 foizni tashkil etdi.
Bir oy davomida birlamchi bozorda yengil avtomobillarni sotish 10 foizga kamaydi. 2022-yil mart oyiga nisbatan birlamchi bozordagi pasayish 16 foizni tashkil etdi.
Shu bilan birga, mahalliy ishlab chiqarilgan yangi yengil avtomobillar savdosi 18,4 ming donani tashkil etdi va 13,8 foizga kamaydi.
Ikkilamchi avtomobil bozorida sotuvlarning pasayishi birlamchi bozorga qaraganda kamroq sezildi.
Bir oy ichida 89 ming dona eski yengil avtomobillar sotilgan, bu bir oy oldingiga nisbatan 3,3 foizga kam. O‘tgan yilning shu davriga nisbatan ushbu toifadagi avtomobillar savdosi 16 foizga oshdi.
Mart oyida sotuvlar kamayganiga birinchi chorakda avtomobil ishlab chiqarish qisqargani ham sabab bo‘lgan.
O‘tgan yilning birinchi choragida 68,9 ming dona yengil avtomobil ishlab chiqarilgan bo‘lsa, 2023-yilda bu ko‘rsatkich 50 ming donagacha keskin pasaydi.
Izoh (0)