“Barselona” murabbiyi Xavi “PSJ” futbolchisi Lionel Messining “Barselona”ga qaytishiga ishontirmoqchi. Bu haqda Diario Sport xabar berdi.
Qayd etilishicha, Xavi “Barselona”da ishlashni boshlagan “birinchi daqiqasidanoq” argentinalik futbolchini jamoaga qaytarishni xohlagan. Katalon jamoasi murabbiyi Messi bilan doimiy aloqada bo‘lib turgan.
Xavi o‘zaro suhbatlarning birida Leoga futbolda qilishi kerak bo‘lgan so‘nggi ish jamoadan chiroyli tarzda butun umrga ketish ekanini aytgan.
Shuningdek, Xavi “Barselona” liderlari bilan ham Messining qaytishini muhokama qilgan. Mark-Andre ter Shtegen, Usmon Dembele va Robert Levandovski ehtimoliy transferga ijobiy munosabat bildirgan. Polshalik futbolchi hujumda Lionel Messi bilan birga o‘ynasa, maydondagi imkoniyatlari oshadi deb hisoblaydi.
Jamoa futbolchisi Serxio Buskets Leo “Barselona”ga qaytsa, klub bilan shartnomani uzaytirishni rejalashtirmoqda.
Xabarlarga ko‘ra, ispaniyalik mutaxassis argentinalik futbolchining jamoaga qaytishiga ishonmoqda. Murabbiy uni “romb” shaklidagi taktikada to‘rtinchi yarim himoyachi sifatida o‘ynashini rejalashtirmoqda.
Ayni vaqtda Messi “PSJ” tarkibida o‘ynamoqda va uning shartnomasi 2022/23-yilgi mavsum yakunigacha mo‘ljallangan.
Izoh (0)