“Барселона” мураббийи Хави “ПСЖ” футболчиси Лионель Мессининг “Барселона”га қайтишига ишонтирмоқчи. Бу ҳақда Diario Sport хабар берди.
Қайд этилишича, Хави “Барселона”да ишлашни бошлаган “биринчи дақиқасиданоқ” аргентиналик футболчини жамоага қайтаришни хоҳлаган. Каталон жамоаси мураббийи Месси билан доимий алоқада бўлиб турган.
Хави ўзаро суҳбатларнинг бирида Леога футболда қилиши керак бўлган сўнгги иш жамоадан чиройли тарзда бутун умрга кетиш эканини айтган.
Шунингдек, Хави “Барселона” лидерлари билан ҳам Мессининг қайтишини муҳокама қилган. Марк-Андре тер Штеген, Усмон Дембеле ва Роберт Левандовски эҳтимолий трансферга ижобий муносабат билдирган. Польшалик футболчи ҳужумда Лионель Месси билан бирга ўйнаса, майдондаги имкониятлари ошади деб ҳисоблайди.
Жамоа футболчиси Серхио Бускетс Лео “Барселона”га қайтса, клуб билан шартномани узайтиришни режалаштирмоқда.
Хабарларга кўра, испаниялик мутахассис аргентиналик футболчининг жамоага қайтишига ишонмоқда. Мураббий уни “ромб” шаклидаги тактикада тўртинчи ярим ҳимоячи сифатида ўйнашини режалаштирмоқда.
Айни вақтда Месси “ПСЖ” таркибида ўйнамоқда ва унинг шартномаси 2022/23 йилги мавсум якунигача мўлжалланган.
Изоҳ (0)