Ukraina Mudofaa vazirligi Razvedka bosh boshqarmasi Rossiyaning Suriyadagi kuchlariga zarbalar berish bo‘yicha rejalar ishlab chiqqan. Bu haqda The Washington Post gazetasi Pentagonning tarmoqlarda paydo bo‘lgan hujjatlariga tayanib xabar berdi.
Nashr versiyasiga ko‘ra, ukrainalik harbiylar bu kabi operatsiyalar orqali Rossiya o‘z qo‘shinlarining bir qismini Ukrainadan Suriyaga qayta tashlashiga umid qilgan.
Hujjatlarda keltirilishicha, Ukraina razvedkasi uchuvchisiz uchish qurilmalaridan foydalangan holda Rossiya kuchlariga zarbalarni amalga oshirish taklifini ilgari surgan. Rejaga muvofiq, “Kichik nishonlardan boshlash” yoki “Vagner” xususiy harbiy kompaniyasi yollanma askarlariga zarbalar berish bilan cheklanish kerak edi.
Shuningdek, idora Suriya demokratik kuchlari (SDF) a’zolarini Rossiya harbiy obyektlariga zarbalar berish uchun tayyorlash imkoniyatini ham ko‘rib chiqqan. Washington Post’ning yozishicha, alyans rejani ma’qullagan, biroq Ukrainadan jangchilarni tayyorlashni ta’minlash havo hujumidan mudofaa tizimlarini taqdim etish, shuningdek, SDF’ning ishtiroki maxfiy qolishini kafolatlashni talab qilgan.
Bundan tashqari, hujjatlarda qayd etilishicha, Turkiya ushbu muhokamalardan xabardor bo‘lgan. Nashr ma’lumotlariga ko‘ra, turk amaldorlari go‘yoki Ukrainadan o‘z operatsiyalarini kurd mamlakatning shimoli va shimoli-g‘arbidagi tumanlardan emas, balki kurd bo‘linmalari nazorati ostida bo‘lgan hududlardan amalga oshirishni so‘ragan.
Bajarilgan ishlarga qaramay, dekabr oxirida Ukraina prezidenti Vladimir Zelenskiy rejalashtirishni to‘xtatish bo‘yicha topshiriq bergan. Pentagon hujjatlarida ta’kidlanishicha, u ushbu qarorni qator sabablar, jumladan, AQSH tomonidan bosimlar, dronlar yetishmasligi yoki hujum muvaffaqiyatli bo‘lishidan shubhalangani sabab qabul qilgan. Amerika razvedkasi ham Ukraina rahbariyati o‘z resurslarini Rossiya ichidagi va Ukrainaning egallab olindan hududlaridagi operatsiyalarga e’tibor qaratishni ma’qul ko‘rgan deb hisoblaydi.
Turkiya va Ukraina tarqalgan ushbu ma’lumotlarga izoh berishdan bosh tortgan. Shu bilan birga, Suriya demokratik kuchlari jurnalistlarga WP’da e’lon qilingan hujjatlarni “haqiqiy emas” deb aytgan.
7-aprel kuni Pentagonning Ukraina Qurolli Kuchlarining bo‘lajak qarshi hujumi bilan bog‘liq maxfiy hujjatlari internetga sizib chiqqani haqida ma’lumot paydo bo‘lgan. Mazkur ma’lumotni Amerikaning The New York Times nashri e’lon qilgan. Mazkur maxfiy ma’lumotlarda qayd etilishicha, Xitoy “Vagner” xususiy harbiy kompaniyasining (Rossiyaga tegishli) 2023-yil boshida qurol va o‘q-dorilarni yetkazib berish bo‘yicha so‘rovini javobsiz qoldirgan.
Izoh (0)