“Katta yettilik” davlatlari Xirosimada o‘tkaziladigan sammitdan oldin Rossiyaga eksportni butunlay to‘xtatish imkoniyatini ko‘rib chiqmoqda. Bu haqda Kyodo angentligi Yaponiya hukumatidagi manbasiga tayanib xabar berdi.
“G7 davlatlari Moskvaga qarshi sanksiyalar rejimini uzaytirish doirasida Rossiyaga amalga oshiriladigan ekportlarni butunlay taqiqlash imkoniyatini ko‘rib chiqyapti”, — deyiladi agentlik xabarida.
Qayd etilishicha, “Katta yettilik” davlatlari hozirda Rossiyaga keng turdagi tovarlar, jumladan, harbiy maqsadlar va hashamatda foydalanish mumkin bo‘lgan mahsulotlar eksportini to‘xtatgan.
“Ammo oxirgi reja minilgan avtomobillar, shinalar, kosmetika tovarlari va kiyim-kechaklar borasidagi savdo embargosini kengaytirishi mumkin”, — deya ta’kidlaydi manba.
“Katta yettilik”ning Xirosimadagi sammiti 19–21-may kunlari bo‘lib o‘tadi.
Ukrainada urush boshlanganining bir yilligi munosabati bilan AQSH va Yevropa Ittifoqi Rossiyaga qarshi yangi sanksiyalar kiritdi. Rossiyaning 11 banki Vashingtonning yangi cheklovlari ostida qoldi. Bundan tashqari, AQSH Rossiyadan alyuminiy va alyuminiy mahsulotlariga 200 foiz boj joriy etmoqda. Rossiyaning 50 dan ortiq amaldorlari, xususan, ba’zi vazir va gubernatorlar yangi sanksiyalarga duchor bo‘ldi. Mart boshlarida AQSH prezidenti Jo Bayden va Germaniya kansleri Olaf Shols Vashingtonda muzokara o‘tkazdi va uning davomida Rossiyani Ukrainadagi voqealar uchun yetarlicha javobgarlikka tortish niyatini bildirgandi.
Izoh (0)