Xitoy “Vagner” xususiy harbiy kompaniyasining (Rossiyaga tegishli) 2023-yil boshida qurol va o‘q-dorilarni yetkazib berish bo‘yicha so‘rovini javobsiz qoldirdi. Bu haqda Financial Times gazetasi AQSH razvedka xizmatlarining sizdirilgan maxfiy materiallariga tayanib, xabar berdi.
“‘Vagner guruhi’ning Xitoyga to‘g‘ridan to‘g‘ri so‘rovi ular Pekin Moskvaga qurol yetkazib berishga va Xitoy korxonalari harbiy kampaniyani (Rossiyaning Ukrainadagi — tahr.) qo‘llab-quvvatlashning boshqa, jiddiy bo‘lmagan shaklidan tashqariga chiqishga ochiq bo‘lishiga ishonchi bo‘lganini ko‘rsatadi”, — deyiladi xabarda.
Shu bilan birga, AQSH razvedkasi hisobotiga ko‘ra, yanvar oyi boshida Xitoy “Vagner” XHKga hatto sinov uchun ham hech qanday qurol yubormagan va qurol-yarog‘ yetkazib berish bo‘yicha mazkur tashkilot bilan bog‘lanmagan.
Vashington avvalroq Pekin muhim o‘q-dorilar, artilleriya snaryadlari va raketa zaxiralarini to‘ldirish uchun Rossiyani qurollar bilan ta’minlash imkoniyatini ko‘rib chiqayotganini, biroq Xitoyning Rossiyaga bunday yordam ko‘rsatganiga hech qanday dalil yo‘qligini ta’kidlagan edi.
Xitoy tomoni Rossiyaga qurol yetkazib berish rejalari borligini bir necha bor rad etib, NATOni Ukrainaga yordam ko‘rsatish orqali mojaroni qo‘zg‘atayotganlikda ayblagan.
AQSH maxsus xizmatlarining maxfiy ma’lumotlarda keltirilishicha, Rossiyaning boshqa ikki yaqin ittifoqchisi — Belarus va Suriya Moskvaning qurollarni sotish bo‘yicha so‘rovlarini qanoatlantirgan. Shuningdek, hujjatda “Vagner” Turkiya bilan qurol-yarog‘ savdosi bo‘yicha aloqa qilgani keltiriladi.
Izoh (0)