Украина Мудофаа вазирлиги Разведка бош бошқармаси Россиянинг Суриядаги кучларига зарбалар бериш бўйича режалар ишлаб чиққан. Бу ҳақда The Washington Post газетаси Пентагоннинг тармоқларда пайдо бўлган ҳужжатларига таяниб хабар берди.
Нашр версиясига кўра, украиналик ҳарбийлар бу каби операциялар орқали Россия ўз қўшинларининг бир қисмини Украинадан Сурияга қайта ташлашига умид қилган.
Ҳужжатларда келтирилишича, Украина разведкаси учувчисиз учиш қурилмаларидан фойдаланган ҳолда Россия кучларига зарбаларни амалга ошириш таклифини илгари сурган. Режага мувофиқ, “Кичик нишонлардан бошлаш” ёки “Вагнер” хусусий ҳарбий компанияси ёлланма аскарларига зарбалар бериш билан чекланиш керак эди.
Шунингдек, идора Сурия демократик кучлари (SDF) аъзоларини Россия ҳарбий объектларига зарбалар бериш учун тайёрлаш имкониятини ҳам кўриб чиққан. Washington Postънинг ёзишича, алянс режани маъқуллаган, бироқ Украинадан жангчиларни тайёрлашни таъминлаш ҳаво ҳужумидан мудофаа тизимларини тақдим этиш, шунингдек, SDF’нинг иштироки махфий қолишини кафолатлашни талаб қилган.
Бундан ташқари, ҳужжатларда қайд этилишича, Туркия ушбу муҳокамалардан хабардор бўлган. Нашр маълумотларига кўра, турк амалдорлари гўёки Украинадан ўз операцияларини курд мамлакатнинг шимоли ва шимоли-ғарбидаги туманлардан эмас, балки курд бўлинмалари назорати остида бўлган ҳудудлардан амалга оширишни сўраган.
Бажарилган ишларга қарамай, декабрь охирида Украина президенти Владимир Зеленский режалаштиришни тўхтатиш бўйича топшириқ берган. Пентагон ҳужжатларида таъкидланишича, у ушбу қарорни қатор сабаблар, жумладан, АҚШ томонидан босимлар, дронлар етишмаслиги ёки ҳужум муваффақиятли бўлишидан шубҳалангани сабаб қабул қилган. Америка разведкаси ҳам Украина раҳбарияти ўз ресурсларини Россия ичидаги ва Украинанинг эгаллаб олиндан ҳудудларидаги операцияларга эътибор қаратишни маъқул кўрган деб ҳисоблайди.
Туркия ва Украина тарқалган ушбу маълумотларга изоҳ беришдан бош тортган. Шу билан бирга, Сурия демократик кучлари журналистларга WPъда эълон қилинган ҳужжатларни “ҳақиқий эмас” деб айтган.
7 апрель куни Пентагоннинг Украина Қуролли Кучларининг бўлажак қарши ҳужуми билан боғлиқ махфий ҳужжатлари интернетга сизиб чиққани ҳақида маълумот пайдо бўлган. Мазкур маълумотни Американинг The New York Times нашри эълон қилган. Мазкур махфий маълумотларда қайд этилишича, Хитой “Вагнер” хусусий ҳарбий компаниясининг (Россияга тегишли) 2023 йил бошида қурол ва ўқ-дориларни етказиб бериш бўйича сўровини жавобсиз қолдирган.
Изоҳ (0)