Суданда бир ҳафтадан буён давом этаётган жанговар ҳаракатларда 400 дан ортиқ одам ҳалок бўлди, 3,5 мингдан ортиқ киши жароҳатланди. Бу ҳақда Жаҳон соғлиқни сақлаш ташкилоти маълумотларига таяниб, Al-Jazeera телеканали хабар бермоқда.
“413 киши ҳалок бўлди, 3 551 киши жароҳат олди”, — деган ЖССТ матбуот котиби Маргарет Харрис брифингда.
Унинг сўзларига кўра, ҳалок бўлганлар орасида болалар ҳам бор, шунингдек, камида 50 нафар бола жароҳатланган.
21 апрель, жума куни, хусусан, пойтахт Хартум ва Баҳри шаҳрида тўқнашувлар давом этмоқда, дейилади Al Jazeera хабарида.
Хартумда электр таъминотида узилишлар кузатилмоқда, ичимлик суви ва озиқ-овқат етишмайди, идора ва мактаблар ёпилган. Электр йўқлиги сабабли шифохоналар нормал ишлай олмаяпти, дори-дармон етишмаяпти.
Кўплаб маҳаллий аҳоли шаҳарни шахсий машиналарда ёки пиёда тарк этишга ҳаракат қилмоқда. Автовокзал шаҳардан автобусда чиқиб кетишни кутаётганлар билан тўлиб-тошган. Гувоҳларнинг айтишича, отишмада ўлганларнинг жасадлари шаҳар кўчаларида ётибди, уларни ҳеч ким йиғиб олмаяпти, ҳавони бадбўй ҳид тутиб кетган.
Ҳафта давомида томонлар сулҳ бўйича келишиб олганини бир неча бор эълон қилди, аммо шунга қарамай, жанговар ҳаракатлар давом этмоқда.
Можаро нима сабабдан бошланди?
Суданда 15 апрель куни бошланган қуролли можаро мамлакатнинг амалдаги президенти, мунтазам армияни назорат қилувчи генерал Абдул Фаттоҳ ал-Бурхон ва унинг ўринбосари, “Тезкор ҳаракат кучлари” қўмондони генерал Муҳаммад Ҳамдан Дагало ўртасидаги муносабатларнинг кескинлашиши натижасида юзага келган.
Улар 2021 йил октябрда давлат тўнтариши натижасида ҳокимиятга келишганди, аммо аста-секин давлатни бу йўналишда бошқариш бўйича келишмовчиликка борди, фуқаролик бошқарувига ўтиш таклиф қилинди.
Қарама-қаршиликнинг кескин босқичи Дагало 100 мингга яқин одамни ташкил этувчи “Тезкор ҳаракат кучларини” бутун мамлакат бўйлаб жойлаштирганидан кейин бошланди, ал-Бурхон буни таҳдид сифатида қабул қилди.
Ҳар икки томон Хартумдаги муҳим объектлар устидан назоратни қўлга олганини даъво қилмоқда, аммо ким нимани назорат қилаётгани ҳали номаълум.
Асосий жанглар шаҳар марказида жойлашган Хартум аэропорти ҳудудида кечмоқда. У ер ва бошқа бир қатор жойлардан осмонга мунтазам қора тутун кўтарилмоқда. Кўчаларда оғир зирҳли машиналар кезиб юрибди.
Изоҳ (0)