Ўзбекистоннинг Испаниядаги элчихонаси томонидан сувни тозалаш соҳасидаги муаммоларни ҳал қилиш бўйича Испаниянинг AZUD компанияси, Валенсиядаги Silkway Valensiya ўзбек—испан савдо-инвестиция уйи ва Қорақалпоғистон Республикаси Вазирлар Кенгаши, мутасадди вазирлик ва идоралари ўртасида ведеоалоқа орқали музокаралар ташкил этилди. Бу ҳақда “Дунё” агентлиги хабар берди.
AZUD штаб-квартираси Испанияда жойлашган 30 йилдан ортиқ тажрибага эга бўлган глобал компания ҳисобланиб, унинг Ҳиндистон, Мексика, Бразилия, Хитой ва Сингапурда шўба корхоналари мавжуд. Компания дискли филтрлашни ишлаб чиқариш ва жорий этиш, шунингдек, саноат, қишлоқ хўжалиги ва коммунал соҳаларда сувни тозалаш соҳасидаги муаммоларини ҳал қилиш бўйича жаҳондаги етакчи компаниялардан бири ҳисобланади.
Суҳбат чоғида испан компаниясининг бош технологи Пабло Руиз ҳамда минтақавий менежери Луис Алтед Қорақалпоғистон Республикаси Вазирлар Кенгаши раиси ўринбосари, инвестициялар, савдо ва саноат вазири Азамат Утеулиев ҳамда қатор вазирлик ва идоралар мутасадди раҳбарларига AZUD компанияси томонидан ишлаб чиқариладиган компакт сув тозалаш ускуналари, жумладан, ичимлик ва қишлоқ хўжалиги учун шўр сувни тузсизлантириш технологиялари ҳамда қуёш энергияси ёрдамида ишлайдиган муқим ва мобил ускуналар тўғрисида тақдимот ўтказди. Ушбу технологиялар асосида испан компанияси дунёнинг кўплаб мамлакатларида амалга оширган лойиҳалари юзасидан атрофлича маълумот берди.
Ўз навбатида, Қорақалпоғистоннинг мутасадди раҳбарлари испан компаниясининг технологияларига катта қизиқиш билдириб, ҳудудда сувсизлик ва шўрланиш оқибатида вужудга келган оғир вазият туфайли бу каби технологиялар ёрдамида қўшма лойиҳалар ишлаб чиқиш таклифини берган.
“Эришилган дастлабки келишувларга асосан, Ўзбекистонда қишлоқ хўжалиги ва етиб бориш қийин бўлган аҳоли пунктларини тоза ичимлик суви билан таъминлаш бўйича пилот лойиҳаларни ишлаб чиқиш режалаштирилди”, — дейилади хабарда.
Шу мақсадда Испания компанияси мутахассисларини яқин муддатларда Қорақалпоғистонга ташрифини амалга ошириши ва кейинчалик Қорақалпоғистон Республикаси раҳбарлари бошчилигидаги делегациянинг Испанияга ташрифини амалга оширишга келишилган.
Ўзбекистонда сувни тежайдиган технологиялар
Апрель бошларида “Сув ресурсларидан фойдаланиш самарадорлигини ошириш бўйича кечиктириб бўлмайдиган чора-тадбирлар тўғрисида”ги президент қарори қабул қилинганди.
Қарорга кўра, 2023 йил 1 апрелдан қишлоқ хўжалиги маҳсулотларини етиштиришда сувни тежайдиган технологиялар жорий этишни давлат томонидан қўллаб-қувватлашнинг қуйидаги тартиби белгиланади:
- тижорат банклари кредитларининг гаров таъминоти 50 фоизгача, бироқ 2,5 миллиард сўмдан ортиқ бўлмаган миқдорда Тадбиркорлик фаолиятини қўллаб-қувватлаш давлат жамғармаси кафиллиги асосида таъминланади;
- тижорат банкларининг миллий валютада ажратиладиган, фоиз ставкаси Марказий банк асосий ставкасининг 1,5 бараваридан ошмаган кредитлари бўйича фоиз ставкасининг асосий ставкадан ошган, бироқ асосий ставканинг 30 фоизидан кўп бўлмаган қисмини қоплаш учун Жамғарма ҳисобидан компенсация тақдим этилади.
Изоҳ (0)