Yanvar—martda avtomobil ishlab chiqarish kamaydi. Bunga nima sabab bo‘lmoqda?

O‘zbekistonda 2023-yilning birinchi choragida qancha avtomobil ishlab chiqarilgani ma’lum bo‘ldi. Bu haqda Statistika agentligi xabar berdi.

Ma’lumotlarga ko‘ra, yanvar—mart oylarida 56,2 mingta avtomobil ishlab chiqarilgan. Bu 2022-yilning mos davriga nisbatan 12,7 ming donaga kamroq. 

Uch oyda eng ko‘p Cobalt avtomobili ishlab chiqarilgan — 17,8 mingta (2022-yilda 19,2 mingta). Birgina mart oyining o‘zida 10 101 dona ushbu rusumdagi avtomobil ishlab chiqarilgan.

Ikkinchi o‘rinda 16,9 ming dona bilan Damas qayd etilgan. Ushbu rusumdagi avtomobillarni ishlab chiqarish o‘tgan yilning shu davriga nisbatan deyarli o‘zgarmagan. Joriy yilning mart oyida esa 7 419 ta bu rusumdagi avtomobil ishlab chiqarilgan.

Biroq, birinchi chorakda Gentra ishlab chiqarish keskin kamaygan — 19,4 mingtadan 11,1 mingtagacha. 

Ma’lumotlarga ko‘ra, 2022-yil oxirida Cobalt va Gentra uchun shartnomalar qabul qilish vaqtinchalik yopilgani ishlab chiqarishning qisqarishiga sabab bo‘lgan. 

Shuningdek, birinchi chorakda 1,8 ming dona Nexia ham ishlab chiqarilgan. UzAuto Motors tomonidan 2022-yilda Nexia ishlab chiqarish butunlay to‘xtatilishi aytilgan edi. 

Biroq 2022 yilda Nexia uchun navbatlar bir yilgacha cho‘zilgan. Kompaniya ko‘p ehtimol bilan shartnoma asosida oldindan to‘lov qilganlar uchun oxirgi Nexia’larni yetkazib bermoqda. 

Bundan tashqari, birinchi chorakda Nexia o‘rnini bosishi kutilgan Onix atigi 559 dona ishlab chiqarilgan. Bu ham umumiy ishlab chiqarish ko‘rsatkichlariga ta’sir o‘tkazgan.

Avvalroq O‘zbekistonda mart oyida avtomobillar sotuvi kamaygani haqida xabar berilgandi.