UzAuto Motors kompaniyasining O‘zbekistondagi dilerlari Damas mikroveni va Labo kichik pikapi uchun shartnomalar tuzishni vaqtincha to‘xtatdi. Buni “O‘zavtosanoat” AJ vakili “Daryo”ga tasdiqladi.
Ma’lum qilinishicha, kompaniya tomonidan mazkur holat bo‘yicha rasmiy bayonot berilishi kutilmoqda.
Damas va Labo’ga shartnomalar tuzish 13-dekabrdan boshlab to‘xtatilgan. Buni UzAutosavdo ilovasi va tegishli botdan ushbu avtomobillar taklifi olib tashlanganidan ham ko‘rish mumkin.
Bir necha kun avval Lacetti va Cobalt kontraktatsiyasi ham to‘xtatilgandi. Biroq bu bo‘yicha ham rasmiy bayonot berilmagan.
Ayni paytda UzAutosavdo ilovasi va kompaniya maxsus botida taklif qilinayotgan eng arzon variantdagi avtomobil narxi 152 million 996 ming so‘mdan boshlanadigan Onix bo‘lib qolmoqda. Ilovada Onix uchun navbat 5 ming 300 ta avtomobilni tashkil etmoqda. Shartnomalar 2023-yil 31-dekabr sanasiga qadar avtomobil yetkazib berish sharti bilan tuzilmoqda.
Eslatib o‘tamiz, kompaniya 2023-yilda Cobalt va Damas avtomobillarining har birini ishlab chiqarish quvvatini 150 ming donagacha oshirib, Gentra ishlab chiqarishni to‘xtatishini ma’lum qilgan.
Izoh (0)