Январь—мартда автомобиль ишлаб чиқариш камайди. Бунга нима сабаб бўлмоқда?

Ўзбекистонда 2023 йилнинг биринчи чорагида қанча автомобиль ишлаб чиқарилгани маълум бўлди. Бу ҳақда Статистика агентлиги хабар берди.

Маълумотларга кўра, январь—март ойларида 56,2 мингта автомобиль ишлаб чиқарилган. Бу 2022 йилнинг мос даврига нисбатан 12,7 минг донага камроқ. 

Уч ойда энг кўп Cobalt автомобили ишлаб чиқарилган — 17,8 мингта (2022 йилда 19,2 мингта). Биргина март ойининг ўзида 10 101 дона ушбу русумдаги автомобиль ишлаб чиқарилган.

Иккинчи ўринда 16,9 минг дона билан Damas қайд этилган. Ушбу русумдаги автомобилларни ишлаб чиқариш ўтган йилнинг шу даврига нисбатан деярли ўзгармаган. Жорий йилнинг март ойида эса 7 419 та бу русумдаги автомобиль ишлаб чиқарилган.

Бироқ, биринчи чоракда Gentra ишлаб чиқариш кескин камайган — 19,4 мингтадан 11,1 мингтагача. 

Маълумотларга кўра, 2022 йил охирида Cobalt ва Gentra учун шартномалар қабул қилиш вақтинчалик ёпилгани ишлаб чиқаришнинг қисқаришига сабаб бўлган. 

Шунингдек, биринчи чоракда 1,8 минг дона Nexia ҳам ишлаб чиқарилган. UzAuto Motors томонидан 2022 йилда Nexia ишлаб чиқариш бутунлай тўхтатилиши айтилган эди. 

Бироқ 2022 йилда Nexia учун навбатлар бир йилгача чўзилган. Компания кўп эҳтимол билан шартнома асосида олдиндан тўлов қилганлар учун охирги Nexia’ларни етказиб бермоқда. 

Бундан ташқари, биринчи чоракда Nexia ўрнини босиши кутилган Onix атиги 559 дона ишлаб чиқарилган. Бу ҳам умумий ишлаб чиқариш кўрсаткичларига таъсир ўтказган.

Аввалроқ Ўзбекистонда март ойида автомобиллар сотуви камайгани ҳақида хабар берилганди.