Kiyev osmonida 19-aprel kuni kechqurun “havo obyektining yorqin nurlanishi kuzatildi”, deb xabar bermoqda Meduza Kiyev shahar harbiy ma’muriyati rahbari Sergey Popkoga tayanib.
Osmondagi chaqnash mahalliy vaqt bilan soat 22:00 (Toshkent vaqti bilan 00:00) atrofida kuzatilgan. Kiyevda havo hujumi to‘g‘risida ogohlantirish e’lon qilindi, biroq “havo hujumidan mudofaa tizimi ishga tushmadi”, dedi Popko.
“Dastlabki ma’lumotlarga ko‘ra, bu hodisa NASA kosmik sun’iy yo‘ldoshining Yerga qulashi natijasi bo‘lgan”, — qo‘shimcha qildi Kiyev rasmiy vakili.
Ukraina kosmik agentligi qoshidagi maxsus nazorat bosh markazi soat 21:57 da “yuqori energiyali akustik hodisa” qayd etilganini bildirdi. “Portlash epimarkazining taxminiy joylashuvi Kiyev viloyatida. Hodisa kosmik jism atmosferaning zich qatlamlariga kirgani bilan bog‘liq bo‘lishi mumkin, ma’lumotlar aniqlanmoqda”, — dedi markaz.
O‘z navbatida, Ukraina Qurolli kuchlari Harbiy-havo kuchlari qo‘mondonligi Kiyev osmonidagi chaqnashlar “sun’iy yo‘ldosh/meteorit qulashi bilan bog‘liq”ligini ta’kidladi. Qo‘mondonlik Rossiya Ukrainaga Kiyev yo‘nalishida “aviahujum vositalari” bilan tahdid qilmayotganini ta’kidladi.
Shu hafta boshida NASA foydalanishdan chiqarilgan 300 kilogrammli RHESSI kosmik apparati 19-aprelda orbitadan chiqishini eʼlon qilgan edi, deb yozadi BBC News. NASA matbuot kotibi Robert Margettaning aytishicha, Kiyevda chaqnashlar kuzatilgan paytda RHESSI apparati hali orbitada bo‘lgan.
Izoh (0)