Saudiya Arabistoni “An-Nassr” futbolchisi Krishtianu Ronalduni nojo‘ya xatti-harakatlari uchun deport qilishi mumkin. Bu haqida ESPN xabar berdi.
Saudiya Arabistoni chempionatidan o‘rin olgan “Al-Hilol”ga qarshi o‘yindan keyin “An-Nassr” hujumchisi Krishtianu Ronaldu muxlislarga qarata nojo‘ya xatti-harakatlar qildi. Portugaliyalik futbolchi muxlislarning “Messi, Messi!” degan hayqiriqlariga javoban bu ishni amalga oshirgan.
Saudiyalik xalqaro huquqshunos Nuf bin Ahmad portugaliyalik futbolchining xatti-harakatlari tufayli prokuraturaga da’vo arizasi bilan murojaat qilishini aytdi.
“Hatto olomon Ronalduni g‘azablantirgan bo‘lsa ham, u noto‘g‘ri munosabat bildirdi. Krishtianuning xatti-harakati — jinoyat, bu jamoat oldidagi behayo harakat. Agar bu harakatlar chet el fuqarolari tomonidan amalga oshirilsa, qamoq va deport jazosi tayinlanadigan jinoyatlardan biridir”, — dedi bin Ahmad.
Keyinroq huquqshunos sudga ariza berganini tasdiqladi.
Bundan tashqari Krishtianu Ronalduning xatti-harakatlari Saudiya Arabistonidagi eng mashhur sport ko‘rsatuvi Action ya Dawri’da ham muhokama qilindi. Ko‘rsatuv boshlovchisi “An-Nassr”dagi manbasi bilan bog‘lanib, Krishtianu Ronaldu o‘yin vaqtida zarba olgani tufayli etikaga to‘g‘ri kelmaydigan xatti-harakat qilganini ta’kidladi.
Sport jurnalisti Ozman Abu Bakr futbolchining ishini tomoshabinlarga nisbatan axloqsiz va qo‘pol ishora deya baholadi va u bilan shartnomani bekor qilishga chaqirdi.
Izoh (0)