Криштиану Роналду Саудия Арабистонидан депортация қилиниши мумкин. Футболчи трибунадаги мухлислар томон ножўя ҳаракатни амалга оширган

Саудия Арабистони “Ан-Насср” футболчиси Криштиану Роналдуни ножўя хатти-ҳаракатлари учун депорт қилиши мумкин. Бу ҳақида ESPN хабар берди.

Саудия Арабистони чемпионатидан ўрин олган “Ал-Ҳилол”га қарши ўйиндан кейин “Ан-Насср” ҳужумчиси Криштиану Роналду мухлисларга қарата ножўя хатти-ҳаракатлар қилди. Португалиялик футболчи мухлисларнинг “Месси, Месси!” деган ҳайқириқларига жавобан бу ишни амалга оширган.

Саудиялик халқаро ҳуқуқшунос Нуф бин Аҳмад португалиялик футболчининг хатти-ҳаракатлари туфайли прокуратурага даъво аризаси билан мурожаат қилишини айтди.

“Ҳатто оломон Роналдуни ғазаблантирган бўлса ҳам, у нотўғри муносабат билдирди. Криштианунинг хатти-ҳаракати — жиноят, бу жамоат олдидаги беҳаё ҳаракат. Агар бу ҳаракатлар чет эл фуқаролари томонидан амалга оширилса, қамоқ ва депорт жазоси тайинланадиган жиноятлардан биридир”, — деди бин Аҳмад.

Кейинроқ ҳуқуқшунос судга ариза берганини тасдиқлади.

Бундан ташқари Криштиану Роналдунинг хатти-ҳаракатлари Саудия Арабистонидаги энг машҳур спорт кўрсатуви Action ya Dawri’да ҳам муҳокама қилинди. Кўрсатув бошловчиси “Ан-Насср”даги манбаси билан боғланиб, Криштиану Роналду ўйин вақтида зарба олгани туфайли этикага тўғри келмайдиган хатти-ҳаракат қилганини таъкидлади.

Спорт журналисти Озман Абу Бакр футболчининг ишини томошабинларга нисбатан ахлоқсиз ва қўпол ишора дея баҳолади ва у билан шартномани бекор қилишга чақирди.