Futbol bo‘yicha Yevropa Chempionlar Ligasining chorak final javob uchrashuvlari bo‘lib o‘tdi. “Manchester Siti” safarda “Bavariya” bilan 1:1 hisobida, “Inter” esa o‘z uyida “Benfika” bilan 3:3 hisobida durang o‘ynadi. Italiya va Angliya klublari musobaqaning yarim final yo‘llanmasini qo‘lga kiritdi.
“Bavariya” — “Manchester Siti” uchrashuviga oid raqamlar
“Manchester Siti” qatorasiga uch mavsum Chempionlar Ligasi yarim finaliga chiqqan APLning uchinchi klubi bo‘ldi. Bungacha “Manchester Yunayted” va “Chelsi” bunday natijaga erishgandi.
Gvardiolada navbatdagi tarixiy rekord
Pep Gvardiola shogirdlari 26 ta gol bilan Chempionlar Ligasining 2022/23-yilgi mavsumida eng ko‘p gol kiritgan jamoa bo‘lib turibdi. Shuningdek, Manchester klubi musobaqada eng kam gol o‘tkazgan jamoa hisoblanadi — 4 ta.
“Manchester Siti” murabbiyi Pep Gvardiola 10 ta mavsumda Yevropa Chempionlar Ligasi yarim finaliga chiqqan birinchi murabbiyga aylandi. Ispan mutaxassisi bu borada Karlo Anchelottini (9) ortda qoldirdi.
“Bavariya” Tomas Tuxel qo‘l ostida uchta o‘yindan beri g‘alaba qozona olmayapti. Myunxen klubi Chempionlar Ligasida chorak finali dastlabki uchrashuvida “Manchester Siti”ga 0:3 hisobida mag‘lub bo‘ldi, Bundesliga doirasida “Hoffenhaym” bilan durang o‘ynagan bo‘lsa, “Manchester Siti”ga qarshi javob uchrashuvida ham 1:1 hisobi qayd etildi.
To‘xtashni bilmayotgan Holand
Chempionlar Ligasining bir mavsumida ingliz klubi safida gol urish bo‘yicha “shaharliklar” hujumchisi Erling Holand “Manchester Yunayted” safida o‘ynagan Rud van Nistelroyga yetib oldi. Norvegiyalik futbolchining gollari soni 12 taga yetdi va bu musobaqa joriy mavsumidagi eng yaxshi ko‘rsatkich bo‘lib turibdi.
Holand “Manchester Siti”dagi faoliyati davomida ilk bor penaltini aniq amalga oshira olmadi. Norvegiyalik futbolchi bungacha 11 metrlik nuqtadan yetti marta gol urgandi.
Kevin de Bruyne golli uzatmalar berish bo‘yicha “Manchester Siti”dagi shaxsiy rekordini yangiladi. Belgiyalik futbolchi “Bavariya”ga qarshi o‘yinda 2022/23-yilgi mavsumdagi 23-golli uzatmasini amalga oshirdi.
“Inter” — “Benfika” uchrashuviga oid raqamlar
“Inter” 13 yil deganda ilk bor Yevropa Chempionlar Ligasi yarim finaliga chiqdi. Milanliklar oxirgi marta 2009/10-yilgi mavsumda bu bosqichga yetib kelgan va musobaqa chempionligini qo‘lga kiritgandi.
“Inter” Chempionlar Ligasi yarim finalida hamshahari “Milan”ga qarshi maydonga tushadi. Bu jamoalarning YCHL pley-off bosqichidagi uchinchi to‘qnashuvi bo‘ladi. Bungacha jamoalar 2002/03-yilgi mavsumda va 2004/05-yilgi mavsumda o‘zaro o‘yin o‘tkazgan. “Neradzurri” ularning hech qaysisida g‘alaba qozona olmagan.
Italiya klubi futbolchisi Nikola Barella pley-off bahsining ikkala o‘yinida ham gol urgan “Inter” tarixidagi uchinchi o‘yinchi bo‘ldi. Bungacha 2002/03-yilgi mavsumda Kristian Viyeri, 2005/06-yilgi mavsumda Deyan Stankovich bunday natija qayd etgan.
Izoh (0)