Karlo Anchelotti qatorasiga 2 yildan beri “Real” boshqaruvi ostida aprel oyida “Chelsi”ni Chempionlar Ligasidan chiqarib yubormoqda. “Qirollik klubi” bu safar ham muammolar qurshovida yotgan londonliklar ustidan ishonchli g‘alabaga erishdi.
“Chelsi” Anchelotti uchun begona jamoa emasligi aniq. Karloga Londonda “o‘zimizniki” deb qarashadi va u Abramovich davridagi eng sevimli murabbiylardan biri sifatida esda qolgan.
Abramovich bilan maxfiy uchrashuvlar va mag‘lubiyatdan keyin yuborilgan “?” smsga berilgan “!” javob
Karlo Anchelotti “Chelsi” bilan munosabatlarini Roman Abramovich bilan bo‘lgan maxfiy uchrashuvlar bilan boshlagan. Uchrashuvlar ikkala tomonda ham yaxshi taassurotlar qoldirganiga qaramay, 2008-yilda London klubi egalari Luis Felipe Skolari variantini tanladi. Ammo braziliyalik yarim yildan so‘ng iste’foga chiqarildi va “Chelsi” yana Anchelotti variantiga qaytdi. Anchelotti “Milan”dagi faoliyatini xuddi allaqachon “Chelsi”ni boshqarayotgandek yakunladi. U muntazam ravishda “Chelsi”ning o‘yinlarini ko‘rib bordi va o‘zi uchun qaydlar belgiladi.
Abramovich bilan bo‘lgan munosabatlar Anchelotti uchun asosiy chaqiruvlardan biri bo‘ldi. Anchelotti o‘zaro munosabatlarni yodga olganga ko‘pincha oson bo‘lmagani haqida gapiradi. Masalan, mavsumdagi birinchi mag‘lubiyatning (“Uigan”ga qarshi o‘yindagi 1:3) ertasiga Abramovich mashg‘ulot bazasiga tashrif buyurib, tushuntirish berishni so‘ragan. “Bu men uchun o‘zaro aloqalarning yangi bosqichi edi. Hatto Berluskoni ham bunchalik talabchan bo‘lmagan”, — degandi Anchelotti.
Abramovich norozilik sifatida Anchelottiga faqat so‘roq belgisi yozilgan smslar yuborgan. Karlo ham qisqa tarzda faqat undov belgisi yozilgan xabar bilan javob qaytargan. “Agressiyaga agressiya bilan javob qaytarmaslikka qaror qilgandim”, — deya izohlagan Anchelotti.
“Chelsi” Anchelotti davrida ajoyib holatda edi. 2009/10-yilgi mavsumda jamoa birinchi marta oltin dubl (chempionlik va Angliya Kubogi) qayd etdi, 103 ta gol urdi, Lempard va Drogba shaxsiy ko‘rsatkichlar bo‘yicha rekordlar o‘rnatdi. Jamoa ning o‘rtacha yoshi 29 yosh-u 75 kunlik edi va APL chempioniga aylangan eng keksa klub bo‘lgandi.
Ikkinchi mavsum boshqacha bo‘ldi. “Chelsi” faqat “Manchester Yunayted”ni o‘zidan oldinga o‘tkazib yubordi va 2-o‘rinni oldi. Biroq bu Abramovichni qoniqtirmadi.
Anchelotti murosa qilishni yaxshi ko‘rardi. Aynan shu narsa uning ketishiga sabab bo‘ldi
Anchelotti o‘zining Angliyaga safarini chaqiruvdek ko‘rgan — bungacha Italiyadan boshqa davlatda ishlamagan edi. U klub tomonidan ingliz tili kurslariga yuborilgan va haftalik intensiv kurslarda o‘z yordamchisi Bruno Demichelis bilan bir kunda 12 soatdan shug‘ullangan. Ma’lumot uchun, Anchelotti “Milan”dan faqat Demichelisni Angliyaga olib kelgandi. Shtabning boshqa a’zolari mahalliy mutaxassislar edi.
Karlo moslashishni va murosa qilishni biladigan murabbiy hisoblanadi. Aynan shuning uchun italiyaliklardan faqat Demichelis uning shtabidan o‘rin olgandi. Lekin u futbolchilar bilan ham yaxshi til topishardi. Anchelotti o‘sha paytdanoq futbolchilarga e’tibor qaratuvchi yetuk murabbiy edi. Bu umumiy tilni topishga va jamoaning erkin bo‘lishiga yordam berdi.
Jon Terri italiyalik mutaxassisning eshita olish qobiliyatini maqtagandi.
“Karlo jamoaga kelib ‘Xo‘sh, mana mening yo‘lim. Bu jamoa uchun yagona yo‘l bo‘ladi, yoki men bu yerda bo‘lmayman’, deydigan murabbiylardan emas. U darhol jamoaning eng tajribali futbolchilari bilan gaplashdi. ‘Albatta, menda qandaydir rejalar bor, lekin so‘nggi yillarda ko‘p narsa o‘rgandingiz. Qarashlaringizni va qay tariqa bunday omadli bo‘ganingizni men bilan o‘rtoqlashing. Futboldan rohat olish uchun qanday yo‘l tutish kerak?’, dedi u.
Anchelotti ‘Milan’da ishlagan vaqtda o‘yinga bir necha kun qolganda taktikani tanlashga o‘rganib qolgan. Angliyada esa bunday emas va u hammasini e’tiborga oldi. Anchelotti yondashuvlarni qorishtirdi, o‘yindan avval taktikani muhokama qilardi, tarkiblarni o‘yindan bir kun avval yoki o‘yin kuni e’lon qilardi. Gap shundaki, u haqiqatdan ham eshitardi. Yana shuni aytishim mumkinki, men bunday ishlaydigan murabbiylarni ko‘p ko‘rmaganman. Hozir ham faqatgina o‘z ma’qullab turib oladigan murabbiylar ko‘p”.
Haqiqatdan ham bunday munosabat jamoaning birinchi mavsumda oltin dubl qayd etishiga sabab bo‘ldi, biroq bir yildan keyin jamoa murabbiysiz qoldi. Jamoada ikkita katta janjal chiqqan vaqtda (Jon Terri va Ueyn Brijning sobiq sevgilisi, Eshli Koulning stajyor talabaga o‘q uzgani) murabbiy jamoadagi o‘zaro ishonchni saqlab qoldi. Shu bilan birga rahbariyat Karloning futbolchilar bilan o‘ta do‘stona munosabatda ekani va uning bo‘sh yondashuvi muammolar keltirib chiqaradi degan fikrda edi.
Keyinchalik Anchelotti jamoadan ketishiga nima sabab bo‘lganini tahlil qildi.
Meni klubdagi vaziyatni tinchlantirish, futbolchilar bilan bir-birimizni tushunishga qodirligim uchun yollashadi. Bu mening asosiy qobiliyatlarimdan biri. Keyin esa xo‘jayinlar boshqa narsani xohlaydi va munosabatlar yomonlashishni boshlaydi. Avvaliga ular mehribon va xotirjam bo‘lishimni istaydi. Keyin esa muammoning ilk belgilari ko‘rinishni boshlaganda aynan shuni sabab qilib ko‘rsatadi. Agar g‘alaba qozonsam xotirjamligim sabab, mag‘lubiyatga uchrasam ham bunga xotirjamligim sabab bo‘ladi. Qanday qilib bular bir xil bo‘lishi mumkin. “Chelsi”da men shunday qopqonga tushib qoldim.
Abramovich bilan munosabatlarning darz ketishi 2010-yilning fevralidagi ikki mag‘lubiyatdan keyin sodir bo‘ldi. “Chelsi” uch kun ichida avval Chempionlar Ligasi 1/8 finalida Joze Mourinyo boshchiligidagi “Inter”ga keyin esa APL doirasida o‘z uyida “Manchester Siti”ga 2:4 hisobida mag‘lub bo‘ldi. Abramovich bu mag‘lubiyatlarni chaqmoq zarbidek qabul qildi. “Manchester Siti”ga qarshi o‘yindan keyin Abramovich tongi 9 da yig‘ilish o‘tkazdi va nima bo‘lganini so‘radi. “Inter”dan qabul qilingan mag‘lubiyatdan keyin esa futbolchilarning oldida murabbiy tanlagan taktikani tanqid qildi.
2011-yilda Chempionlar Ligasi chorak finalida “Manchester Yunayted”dan uchralgan mag‘lubiyat “Chelsi” rahbarlari uchun yakuniy nuqta bo‘ldi.
“Javob o‘yini arafasida Abramovich futbolchilarga yuzlanib, ular g‘alaba qozonishi kerakligini, aks holda jamoani katta o‘zgarishlar kutayotganini aytdi. U menga, agar yutqazsak, ishga qaytib kelmasligimni aytdi. Biz yutqazdik, o‘zimni tirik murdadek his qilsam ham qaytib keldim”, — deya esga oladi italiyalik murabbiy.
Murabbiy oxirgi o‘yindan keyin darhol “Gudisson Park” koridorida iste’foga chiqarilgan
Sakkiz yil o‘tganidan keyin u “Everton” murabbiyi etib tayinlandi va taqdimot marosimida bu voqea haqida hazil qildi. “O‘ylashimcha bu yerga ‘Shu yerda Anchelotti iste‘foga chiqarilgan’ degan yozuv o‘rnatilishi kerak”, — degandi italiyalik mutaxassis.
“Everton”ga tegishli “Gudisson Park” stadioni 2011-yilda APL tarixidagi eng sovuq iste’folardan birini ko‘rgan. Mavsumning so‘nggi uchrashuvida “Chelsi” “Everton”ga 0:1 hisobida mag‘lub bo‘lgan. Anchelotti jurnalistlarga intervyu berayotgan vaqtda press-zonada uni jamoaning boshqaruvchi direktori Ron Gurley kutayotgandi. Anchelotti intervyu berishni tugatgan zahoti Gurley unga ishdan bo‘shatilganini aytgan.
Oradan ancha yil o‘tib “Real Madrid” murabbiyi sifatida faoliyat olib borayotgan mutaxassis qatorasiga ikkinchi yil sobiq jamoasini musobaqadan chiqarib yubormoqda.
Izoh (0)