Farg‘ona viloyati Oltiariq tumanida uchta yuk mashinasi ishtirokida yo‘l transport hodisasi sodir bo‘ldi. Bu haqda viloyat Yo‘l harakati xavfsizligi boshqarmasi axborot xizmati xabar berdi.
Xabarga ko‘ra, holat 17-aprel kuni soat 23:30 larda Oltiariq tumani hududidan o‘tgan A-373 Toshkent-O‘sh avtomobil yo‘lining 347-kilometrida sodir bo‘lgan. 1986-yilda tug‘ilgan haydovchi S.T HOWO rusumli yuk avtomobilini boshqarib ketayotib, rul boshqaruvini yo‘qotgan va yo‘l chetida to‘xtab turgan, 1986-yilda tug‘ilgan haydovchi M.B boshqaruvidagi Isuzu yuk avtomobilining orqa qismiga borib urilgan.
Oqibatda ushbu Isuzu avtomobili boshqaruvni yo‘qotib o‘zidan oldinda to‘xtab turgan 1982-yilda tug‘ilgan haydovchi M.M boshqaruvidagi yana bir Isuzuʼning orqa qismiga borib urilgan.
Dastlabki maʼlumotlarga ko‘ra, to‘qnashuv natijasida avtomobillar texnik shikastlangan, tan jarohati olganlar yo‘q. Hozirda ushbu holat yuzasidan tergovga qadar tekshiruv harakatlari olib borilmoqda.
Izoh (0)