Prezident tomonidan “O‘zbekiston Respublikasi Mudofaa vazirligi huzuridagi Jamoatchilik kengashi faoliyati samaradorligini oshirish chora-tadbirlari to‘g‘risida”gi farmon imzolandi, deb xabar beradi Norma.
Jamoatchilik kengashining asosiy vazifalari:
- mudofaa va harbiy sohada jamoatchilik hamda xalqaro hamjamiyat tomonidan bildirilgan takliflarni tahlil qilish;
- Mudofaa vazirligini fuqarolar bilan bog‘lab turuvchi “ko‘prik” vazifasini bajarish;
- harbiy xizmatchilar ijtimoiy- huquqiy jihatdan himoya qilish bo‘yicha tegishli dasturlarning bajarilishini kompleks tahlil qilishda ishtirok etish;
- harbiy xizmatdan rezerv (zaxira)ga bo‘shatilgan fuqarolarning ijtimoiy va professional moslashuvi hamda bandligi bilan bog‘liq, masalalarni hal etishda bevosita ishtirok etish;
- Mudofaa vazirligiga normativ-huquqiy va boshqa hujjatlar loyihalarini ishlab chiqishda ko‘maklashish;
- yoshlarni vatanparvarlik, istiqlol g‘oyalariga sadoqat ruhida tarbiyalash ishlarini muvofiqlashtirib borishda ishtirok etish.
Jamoatchilik kengashi o‘z faoliyatini jamoatchilik asosida olib boradigan maslahat-kengash organi hisoblanadi.
Jamoatchilik kengashining qarori kengash majlisida ishtirok etayotgan aʼzolarning ko‘pchilik ovozi bilan qabul qilinadi. Jamoatchilik kengashining har bir aʼzosi majburiy ravishda qabul qilinayotgan qaror bo‘yicha o‘zining alohida fikrini yozma shaklda ifodalashga haqli. Jamoatchilik kengashining qarori tavsiyaviy xususiyatga ega.
Hujjat bilan:
- Mudofaa vazirligi huzuridagi Jamoatchilik kengashining yangilangan tarkibi;
- Qoraqalpog‘iston Respublikasi Vazirlar Kengashi va viloyatlar hokimliklarida Jamoatchilik kengashining hududiy bo‘linmalarining namunaviy tarkibi;
- Jamoatchilik kengashi to‘g‘risida nizom tasdiqlanmoqda.
Mudofaa vazirligi Jamoatchilik kengashi raisi etib, Qonunchilik palatasi deputati Iqbol Mirzaaliyev tayinlangan.
Hujjat Qonunchilik maʼlumotlari milliy bazasida eʼlon qilingan va 13-apreldan kuchga kirgan.
Mart o‘rtalarida “Vatan himoyasi va el-yurtimiz tinchligi yo‘lida halok bo‘lgan harbiy xizmatchilar va xodimlar oila aʼzolarini ijtimoiy qo‘llab-quvvatlashni kuchaytirish chora-tadbirlari to‘g‘risida”gi prezident farmoni qabul qilingandi. Unga ko‘ra, harbiy xizmatchilarning (xodimlarning) davlat majburiy shaxsiy sug‘urtasi doirasida harbiy xizmatchi (xodim) halok bo‘lganda to‘lanadigan sug‘urta summasi bazaviy hisoblash miqdorining 200 baravari miqdorida etib belgilangan.
Izoh (0)