Андижон давлат тиббиёт институти муассасага хорижлик талабаларни жалб қилиш мақсадида Ҳиндистон бўйича учта ваколатли офисини очди. Бу ҳақда “Дарё”га институт ахборот хизмати хабар бермоқда.
Таъкидланишича, президент Шавкат Мирзиёевнинг 29 март куни туризм салоҳиятини жадал ривожлантириш юзасидан ўтказган видеоселектор йиғилиши берилган топшириқлар ижросини таъминлаш мақсадида Андижон вилояти ҳокимлиги делегацияси Ҳиндистонга борган.
Хизмат сафари давомида Андижон давлат тиббиёт институти ректори Мадамин Мадазимов Деҳли ва Баларампур шаҳарларида жойлашган институтнинг учта ваколатли офислари очилишида иштирок этиб, масъул шахсларга ишонч сертификатларини топширган.
“Айни пайтда институтимизда 502 нафар хорижлик талаба таҳсил олишмоқда. Эътиборли жиҳати уларнинг 298 нафари ҳинд талабалар. Бундан кўриниб турибдики, ҳиндистонлик ёшларнинг республикамиздаги тиббиёт муассасаларига бўлган қизиқиши ортиб бормоқда.
Мана шуларни ҳисобга олиб, ҳамкорларимиз билан келишган ҳолда Ҳиндистон бўйича ваколатли офисларни очишга қарор қилдик. Бундан мақсад тиббиёт соҳасига қизиқадиган ёшларни институтимизга тўғридан тўғри жалб этишдан иборат. Бугунги очилиш маросимидан сўнг 50га яқин ҳиндистонлик ёшлар билан мулоқот ўтказиб, таълим жараёнлари, яратилган шароитлар ҳақида маълумот бердик. Уларнинг аксарияти келгуси ўқув йилидан биздан таҳсил олиш мақсадида эканликларини билдиришди”,— дейди Мадамин Мадазимов.
Институт ахборот хизмати ходими Ойжамол Раҳмонованинг қўшимча қилишича, сафар давомида ҳиндистонлик мутахассисларни АDTI клиникасига жалб қилиш, жигар, буйрак ва юрак трансплантология соҳаси бўйича мураккаб жарроҳлик амалиётларини вилоятнинг ўзида йўлга қўйиш, шунингдек, Ўзбекистондаги доривор ўсимликларни биргаликда ўрганиш, ушбу йўналиш бўйича қўшма таълим дастурларини ишга тушириш бўйича ҳам Аюш халқ табобати вазирлиги билан ҳамкорлик меморандумлари имзоланган.
Изоҳ (0)