Toshkent shahri Mirzo Ulug‘bek tumanidagi klinikada 13-aprel kuni tibbiyot xodimlari shifoxona devorlarini tozaladi. Bandlik vazirligi axborot xizmati holat yuzasidan munosabat bildirdi.
Qayd etilishicha, mazkur holat bo‘yicha shifoxona bosh shifokori va xodimlaridan tushuntirish xatlari olingan. Bunda muassasaning kichik tibbiy xodimlari (sanitarka) tomonidan har kuni tozalash ishlari olib borilishi, ushbu ishlar to‘g‘ridan to‘g‘ri kichik tibbiy xodimlarning funksional vazifasiga kirishi ko‘rsatilgan.
Shuningdek, tushuntirish xatlarida xodimlarning o‘z xizmat vazifalaridan boshqa ishlarni hamda ish vaqtidan tashqari yumushlarni bajarishga topshiriq va buyruqlar qabul qilinmagani aks etgan. Tasdiqlangan xizmat vazifalarida shifoxonada tozalash ishlari aynan kichik tibbiy xodimining funksional vazifasiga kirishi ko‘rsatilgan.
“Agar siz majburiy tarzda biror-bir mehnatga jalb etish bilan bog‘liq muammolarga duch kelsangiz, Bandlik vazirligining Davlat mehnat inspeksiyasiga murojaat qilishingizni so‘raymiz. Biz har qanday turdagi majburiy mehnatga qarshimiz va har qanday holatni o‘rganib chiqishga tayyormiz. Barcha ma’lumot va murojaatlar belgilangan tartibda tezkorlik bilan o‘rganib chiqiladi hamda zarur choralar ko‘riladi. Murojaatchining roziligisiz shaxsiga doir biror-bir ma’lumot oshkor etilmasligi kafolatlanadi”, — deyiladi vazirlik xabarida.
Izoh (0)