Yevropa Ittifoqi kengashi 13-aprel kuni Ukraina uchun o‘q-dorilar xarid qilish bo‘yicha yangi reja doirasida Yevropa tinchlik jamg‘armasidan 1 milliard yevro ajratishni ma’qulladi.
Bu chora Yevropa Ittifoqi davlatlariga 2023-yil 9-fevraldan 31-maygacha bo‘lgan muddatda Ukrainaga yuborilgan o‘q-dorilar narxini mavjud zaxiralardan qoplash yoki buyurtmalarga ustunlik berish orqali qoplash imkonini beradi.
Shu tariqa Yevropa Ittifoqi 20-mart kuni YI Kengashi tomonidan qabul qilingan rejaning birinchi qismini amalga oshirishga kirishdi. Reja uch bosqichdan iborat: ittifoqqa a’zo mamlakatlar zaxiralaridan Ukrainaga o‘q-dorilar berish, Ukrainaga berish va o‘z zaxiralarini to‘ldirish uchun YI mamlakatlaridagi mudofaa sanoati korxonalari bilan o‘q-dori ishlab chiqarish bo‘yicha yangi shartnomalarni ma’qullash, ushbu sohadagi ishlab chiqarish quvvatini oshirish. Yevropa Ittifoqining maqsadi — 2023-yilda Ukrainaga 1 million dona 155 millimetrli artilleriya snaryadlarini yuborish.
Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Ukrainaga o‘q-dori yetkazib berish bo‘yicha kelishuvni tarixiy deb atadi hamda Yevropa Ittifoqi Ukrainaning Rossiya bosqiniga qarshi o‘zini himoya qilish bo‘yicha qonuniy huquqini qo‘llab-quvvatlashda davom etishini ta’kidladi.
Ukrainaga Yevropa tinchlik jamg‘armasi orqali berilgan harbiy yordam miqdori 4,6 milliard yevroga yetgan. Jamg‘arma 2021-yilda mojarolarning oldini olish, tinchlikni saqlash va xalqaro xavfsizlik va barqarorlikni mustahkamlash maqsadida Yevropa Ittifoqining harbiy va mudofaa bo‘yicha hamkorlarini qo‘llab-quvvatlash maqsadida tashkil etilgandi.
Izoh (0)