Европа Иттифоқи кенгаши 13 апрель куни Украина учун ўқ-дорилар харид қилиш бўйича янги режа доирасида Европа тинчлик жамғармасидан 1 миллиард евро ажратишни маъқуллади.
Бу чора Европа Иттифоқи давлатларига 2023 йил 9 февралдан 31 майгача бўлган муддатда Украинага юборилган ўқ-дорилар нархини мавжуд захиралардан қоплаш ёки буюртмаларга устунлик бериш орқали қоплаш имконини беради.
Шу тариқа Европа Иттифоқи 20 март куни ЕИ Кенгаши томонидан қабул қилинган режанинг биринчи қисмини амалга оширишга киришди. Режа уч босқичдан иборат: иттифоққа аъзо мамлакатлар захираларидан Украинага ўқ-дорилар бериш, Украинага бериш ва ўз захираларини тўлдириш учун ЕИ мамлакатларидаги мудофаа саноати корхоналари билан ўқ-дори ишлаб чиқариш бўйича янги шартномаларни маъқуллаш, ушбу соҳадаги ишлаб чиқариш қувватини ошириш. Европа Иттифоқининг мақсади — 2023 йилда Украинага 1 миллион дона 155 миллиметрли артиллерия снарядларини юбориш.
Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел Украинага ўқ-дори етказиб бериш бўйича келишувни тарихий деб атади ҳамда Европа Иттифоқи Украинанинг Россия босқинига қарши ўзини ҳимоя қилиш бўйича қонуний ҳуқуқини қўллаб-қувватлашда давом этишини таъкидлади.
Украинага Европа тинчлик жамғармаси орқали берилган ҳарбий ёрдам миқдори 4,6 миллиард еврога етган. Жамғарма 2021 йилда можароларнинг олдини олиш, тинчликни сақлаш ва халқаро хавфсизлик ва барқарорликни мустаҳкамлаш мақсадида Европа Иттифоқининг ҳарбий ва мудофаа бўйича ҳамкорларини қўллаб-қувватлаш мақсадида ташкил этилганди.
Изоҳ (0)