Germaniya yaqin yillarda Ukrainaga harbiy yordamni oshirishni rejalashtirmoqda. Der Spiegel nashri ma’lumotlariga ko‘ra, Germaniya Moliya vazirligi davlat kotibi o‘rinbosari Florian Tonkar o‘z maktubida Bundestagning budjet qo‘mitasidan ushbu maqsadlar uchun ko‘proq mablag‘ ajratishni so‘ragan. Yordamning umumiy miqdori 15 milliard yevrodan oshishi mumkin.
“Ukraina armiyasining katta moddiy yo‘qotishlari yangi materiallar yetkazib berishni talab etmoqda”, — deyiladi Tonkarning maktubida. Der Spiegel nashrining yozishicha, Bundestagning budjet qo‘mitasi Ukrainaga harbiy yordamni kengaytirishdan bosh tortmaydi.
Ayni paytda Germaniya Ukrainaga qurol yetkazib berish va Bundesver omborlaridan Kiyevga o‘tkazilgan qurollar o‘rnini to‘ldirish uchun 2,2 milliard yevro ajratgan. Bu yil ushbu miqdor 5,4 milliard yevroga oshirilishi mumkin. Yaqin yillarda Ukraina oldidagi majburiyatlarni bajarish uchun yana 8,8 milliard yevro ajratish rejalashtirilgan, Mudofaa vazirligi shuncha summaga shartnomalar tuzishi mumkin. Hozirda bu maqsadlar uchun 1 milliard yevro ajratilgan.
Germaniya 27-mart kuni Ukrainaga 18 ta Leopard 2A6 tanki yetkazilganini e’lon qildi. Der Spiegel nashrining yozishicha, ular bilan birga mamlakatga 40 ga yaqin Marder piyoda askarlar jangovar mashinalari kelgan.
Izoh (0)