Qiziqchi Nodirbek Hayitov “Daryo” internet nashriga intervyu berdi. U hazilni tushunmaydigan insonlar ham borligi, to‘ylarda noqulay vaziyatga tushgani va Nodir Lo‘li taxallusidan nega voz kechgani haqida so‘zlab berdi.
— Xizmatlarda noqulay vaziyatga tushib, fayz ololmagan paytlarimiz ham bo‘ladi. Mana, masalan, yaqinda restoranga uchrashuv tadbiriga taklif qilishdi. Har yili turli hududlardan kelgan ishtirokchilar bir restoranni gaplashib, ziyofat qilishar ekan. Xullas, ana shunday xizmatlarning biriga taklif etishdi. U yerdagi odamlarning bari kazo-kazolar ekan. Kuldirishga qanchalik harakat qilmay, uddalay olmadim. Ayol haqida gapirsam, bittasi o‘rnidan turib, mikrofonda “Siz konstitutsiyaga qarshi gapiryapsiz”, deb hazilni ham siyosatga burib ketdi. Gapni qanchalik hazilga yo‘ysam, u shunchalik jiddiyga olardi. Xullas, juda qiyin va noqulay vaziyatga tushganman. Bu davrada fayz ololmaslikka ko‘zim yetganidan keyin ketishga qaror qildim. Shunda bir ayol yonimga kelib, “Sizni televizorda ko‘rib, hurmat qilardim. Umuman qiziqchilik qilolmas ekansiz”, dedi. Bu gap yana bir zarba bo‘ldi. Xullas, ana shunday vaziyatlarda san’atkor bo‘lganimdan afsuslanaman. Undan ko‘ra biror davlat tashkilotida ishlamaymanmi yoki tadbirkorlik bilan shug‘ullanmaymanmi, deb afsuslanaman, — deydi Nodirbek Hayitov.
Xalq orasida Nodir Lo‘li taxallusi bilan tanilgan ijodkor keyingi paytlarda familiyasi bilan ommaga ko‘rinish bermoqda. Buning sababini quyidagicha izohladi.
— Lo‘li nomini xalq bergandi. Bu obrazim xalq orasida tanilishimga katta hissa qo‘shdi. Ammo bir obraz bilan qolib ketishni istamadim. Shu bois repertuarni yangi obrazlar bilan kengaytirdim. Masalan, hozir meni deputat yoki hokim buvi deydiganlar ham ko‘p. Satirik hazillarim sekin-asta muxlislarga manzur kelyapti, — deydi ijodkor.
Nodirbek Hayitov lo‘li millati bilan yaqin ekanligini, ular san’atni qadrlashi va ularning e’tiroziga sabab bo‘lgan hazillari haqida aytib berdi.
— Bektemirda lo‘li millati vakillari yashaydigan mahalla bor. Uyimizga juda yaqin. Ularning ko‘pchiligi bilan yaqin bo‘lib ketganmiz. Hatto ular bilan oldi-berdi ham qilib turamiz, juda ajoyib insonlar. Ular san’atni juda qadrlashadi, hatto eng mashhur san’atkorlarni ham to‘ylariga taklif etishadi. Ularning to‘ylarida qistir-qistirlar juda zo‘r bo‘ladi. Sahnadagi ba’zi hazillarim sabab biroz ranjishgan, e’tiroz bildirgan paytlari ham bo‘lgan. “Nega bizning ustimizdan kulyapsan”, deyishgan. Kulmayapman, sizlar orqali o‘zbek xalqining qanchalik ishonuvchan ekanligini ko‘rsatmoqchi bo‘ldim, deb vaziyatdan chiqqanman, — deydi Nodirbek Hayitov.
Izoh (0)