“Farzandning ota-onadan avval ketishi — bu noto‘g‘ri”. O‘zbekiston xalq artisti Muhammadsoli Yusupov uch yil avval 37 yoshli o‘g‘li vafot etgani haqida (video)

O‘zbekiston xalq artisti, aktyor Muhammadsoli Yusupov “Sevimli” telekanalining “Albom” ko‘rsatuviga bergan intervyusida uch yil avval 37 yoshli o‘g‘li vafot etgani haqida gapirib berdi. 

“O‘g‘limni do‘stlari ham, teatrdagilar ham esidan chiqargani yo‘q”

— Aqlbovar qilmas darajadagi hodisa. Uydan o‘ynab-kulib, hazillashib chiqib ketgan insonni bir soatdan so‘ng olamdan o‘tdi, deyishsa, buni hazm qilib bo‘lmaydi. Hech ishonmadim, borib ko‘rdim, shifokorlar tekshirgandan keyin bo‘lmadi, infarkt olgan ekan. Do‘stlari bilan futbol o‘ynagan, keyin yo‘lda qaytishda yuragining mazasi bo‘lmay qolgan. Shunaqa bo‘ldi, lekin o‘g‘limni do‘stlari ham, teatrdagilar ham esidan chiqargani yo‘q.

Ikki yildan oshyapti, men haligacha ko‘nika olmayman. Inson bu narsaga ko‘nika olmasa ham kerak. Ota-onaning dunyodan o‘tishi qonuniyatdek gap, biroq ota-ona tirik bo‘lib turib farzandning bu dunyodan o‘tishi noto‘g‘ri. Shuning  uchun hech kimga farzand dog‘ini ko‘rsatmasin. Dunyo bor ekan, hayot qonuniyatlari o‘zining yo‘lida ketishi kerak. Bunaqa o‘zgarishlar bo‘lmasligi kerak, hamma o‘z yo‘lidan ketgani to‘g‘ri bo‘ladi. Allohga kerak ekan, farzandimdan ajraldim.