“Бир образда қолиб кетишни истамадим”. Нодирбек Ҳайитов Лўли тахаллусидан воз кечгани сабаби ҳақида (видео)

Қизиқчи Нодирбек Ҳайитов “Дарё” интернет нашрига интервью берди. У ҳазилни тушунмайдиган инсонлар ҳам борлиги, тўйларда ноқулай вазиятга тушгани ва Нодир Лўли тахаллусидан нега воз кечгани ҳақида сўзлаб берди.

— Хизматларда ноқулай вазиятга тушиб, файз ололмаган пайтларимиз ҳам бўлади. Мана, масалан, яқинда ресторанга учрашув тадбирига таклиф қилишди. Ҳар йили турли ҳудудлардан келган иштирокчилар бир ресторанни гаплашиб, зиёфат қилишар экан. Хуллас, ана шундай хизматларнинг бирига таклиф этишди. У ердаги одамларнинг бари казо-казолар экан. Кулдиришга қанчалик ҳаракат қилмай, уддалай олмадим. Аёл ҳақида гапирсам, биттаси ўрнидан туриб, микрофонда “Сиз конституцияга қарши гапиряпсиз”, деб ҳазилни ҳам сиёсатга буриб кетди. Гапни қанчалик ҳазилга йўйсам, у шунчалик жиддийга оларди. Хуллас, жуда қийин ва ноқулай вазиятга тушганман. Бу даврада файз ололмасликка кўзим етганидан кейин кетишга қарор қилдим. Шунда бир аёл ёнимга келиб, “Сизни телевизорда кўриб, ҳурмат қилардим. Умуман қизиқчилик қилолмас экансиз”, деди. Бу гап яна бир зарба бўлди. Хуллас, ана шундай вазиятларда санъаткор бўлганимдан афсусланаман. Ундан кўра бирор давлат ташкилотида ишламайманми ёки тадбиркорлик билан шуғулланмайманми, деб афсусланаман, — дейди Нодирбек Ҳайитов.

Халқ орасида Нодир Лўли тахаллуси билан танилган ижодкор кейинги пайтларда фамилияси билан оммага кўриниш бермоқда. Бунинг сабабини қуйидагича изоҳлади.

— Лўли номини халқ берганди. Бу образим халқ орасида танилишимга катта ҳисса қўшди. Аммо бир образ билан қолиб кетишни истамадим. Шу боис  рэпертуарни янги образлар билан кенгайтирдим. Масалан, ҳозир мени депутат ёки ҳоким буви дейдиганлар ҳам кўп. Сатирик ҳазилларим секин-аста мухлисларга манзур келяпти, — дейди ижодкор.

Нодирбек Ҳайитов лўли миллати билан яқин эканлигини, улар санъатни қадрлаши ва уларнинг эътирозига сабаб бўлган ҳазиллари ҳақида айтиб берди.

— Бектемирда лўли миллати вакиллари яшайдиган маҳалла бор. Уйимизга жуда яқин. Уларнинг кўпчилиги билан яқин бўлиб кетганмиз. Ҳатто улар билан олди-берди ҳам қилиб турамиз, жуда ажойиб инсонлар. Улар санъатни жуда қадрлашади, ҳатто энг машҳур санъаткорларни ҳам тўйларига таклиф этишади. Уларнинг тўйларида қистир-қистирлар жуда зўр бўлади. Саҳнадаги баъзи ҳазилларим сабаб бироз ранжишган, эътироз билдирган пайтлари ҳам бўлган. “Нега бизнинг устимиздан куляпсан”, дейишган. Кулмаяпман, сизлар орқали ўзбек халқининг қанчалик ишонувчан эканлигини кўрсатмоқчи бўлдим, деб вазиятдан чиққанман, — дейди Нодирбек Ҳайитов.