O‘zbekiston fuqarolarida qaysi rusumdagi mashinalar soni ko‘pligi ma’lum qilindi

Statistika agentligi 2023-yilning 1-yanvar holatiga (majburiy texnik ko‘rik natijalariga ko‘ra) jismoniy shaxslarga tegishli bo‘lgan eng ommalashgan yengil avtomobillar sonini ma’lum qildi.

Ma’lumotlarga ko‘ra, o‘zbekistonliklarga tegishli bo‘lgan eng ommalashgan yengil avtomobillar sonida Nexia yetakchilik qilmoqda — 752 490 dona. Undan keyingi o‘rinlarni mos ravishda 529 934 dona hamda 404 746 dona bo‘lgan Damas va Cobalt egalladi.

Ushbu ko‘rsatkich qolgan avtomashinalar kesimida quyidagicha ko‘rinishga ega: 

• Lacetti — 390 538 dona;
• Spark — 352 085 dona;
• Matiz — 296 442 dona.

Avvalroq Statistika agentligi Toshkentda har ming kishiga o‘rtacha 193 ta yengil avtomobil to‘g‘ri kelayotganini ma’lum qilgandi. Iqtisodiy tadqiqotlar va islohotlar markazining ma’lum qilishicha, O‘zbekistonda fevral oyida avtomobil bozorida faollikning pasayishi qayd etilgan. Bir oy davomida sotilgan avtotransport vositalari soni 123,4 mingtani tashkil etib, joriy yilning yanvar oyiga nisbatan 2,5 foiz va o‘tgan yilning fevral oyiga nisbatan 3,8 foizga kamaydi.