Ўзбекистон элчихонаси ходимлари Малайзиянинг Gemilang Coachwоrk Sdn. Bhd компаниясининг ижрочи директори Панг Чонг Ёнг билан учрашув ўтказди. Бу ҳақда “Дунё” агентлиги хабар берди.
Учрашувда Малайзия компанияси ва “Ўзавтосаноат” АЖ таркибидаги корхоналари ўртасида ўзаро ҳамкорликни янада чуқурлаштириш истиқболлари муҳокама қилинган.
Gemilang Coachwork Sdn. Bhd компаниясининг ижрочи директори Панг Чонг Ёнг Ўзбекистоннинг Uz Truck and Bus Motors ҚК МЧЖ билан ўзаро ҳамкорлик ҳолатидан мамнун эканини билдирган. Суҳбатдош келгусида “Самавто” МЧЖ корхонаси билан корхона эҳтиёжлари учун алюминий кузовлар етказиб бериш ва биргаликда электро автобуслар ишлаб чиқариш имкониятларини ўрганишга қизиқиш билдирган.
Учрашув натижасида Малайзия компанияси билан “Ўзавтосаноат” АЖ ўртасида ҳамкорлик истиқболларини муҳокама қилиш ва “Самавто” МЧЖ негизида электро автобуслар ишлаб чиқариш имкониятларини ўрганиш бўйича онлайн музокаралар ўтказиш юзасидан келишиб олинган.
1992 йилда ташкил этилган бош қароргоҳ Малайзиянинг Жоҳор штатида жойлашган Gemilang Coachwork Sdn. Bhd автобуслар ва бутловчи қисмлар ишлаб чиқариш билан шуғулланади. Йиллик ишлаб чиқариш ҳажми мингга яқин автобус ва кузовни ташкил этади. Корхона маҳсулотлари АҚШ, Европа, Жануби-Шарқий Осиё ва Ўзбекистонга экспорт қилинади. Мазкур компания ва Uz Truck and Bus Motors ҚК МЧЖ ўртасида 2015 йилда ҳамкорлик ўрнатилган. Ҳамкорлик доирасида малайзия компанияси томонидан мамлакатимизга MAN автобуслари учун 350 та кузовлар етказиб берилган.
Аввалроқ Ўзбекистон Олий таълим, фан ва инновациялар вазирлиги, “‘Навоий’ Maxсус иқтисодий зона дирекцияси” вакиллари ва Малайзиянинг учувчисиз бошқариладиган аппаратларни (дронлар) ишлаб чиқаришга ихтисослашган бир қатор етакчи компаниялари ўртасида онлайн учрашувлар ташкил этилгани тўғрисида хабар берилганди.
Изоҳ (0)