Birlashgan Millatlar Tashkilotining (BMT) Ukrainadagi Inson huquqlari monitoringi missiyasi ukrainalik harbiy asirning boshi kesilayotgani aks etgan videoga munosabat bildirdi.
Missiyaning ta’kidlashicha, “bu qonunbuzarliklar, boshqalar singari tegishli tarzda tekshirilishi va aybdorlar javobgarlikka tortilishi kerak”.
“Videolarning birida go‘yoki ukrainalik harbiy asirning shafqatsiz qatl etilgani, ikkinchisida esa ehtimol ukrainalik harbiy xizmatchilarning jasadlari ko‘rsatilgan, afsuski, bu yagona holat emas. Oxirgi hisobotlarda missiya xalqaro gumanitar huquqning bir qator jiddiy buzilishlarini, jumladan harbiy asirlarga nisbatan sodir etilgan holatlarni hujjatlashtirdi”, — deyiladi munosabatda.
BMT Ukrainada urush boshlanganidan beri o‘nlab harbiy asirlarning qatl etilganini hujjatlashtirgan. BMT Inson huquqlari bo‘yicha Oliy komissari boshqarmasi hisobotida 15 nafar ukrainalik harbiy asirning Rossiya qo‘shinlari tomonidan qatl etilishi, ulardan tirik qalqon sifatida foydalanish, tibbiy yordam ko‘rsatilmagani sababli ikki yaradorning o‘limi, qiynoqlar haqida so‘z boradi.
BMT kamida 25 nafar rossiyalik harbiy asirning qatl etilgani haqida ham ma’lumot olgan. Rossiyaga aloqador qurolli guruhlarning ba’zi a’zolari taslim bo‘lishdan bosh tortgandan so‘ng ukrainalik askarlar tomonidan o‘ldirilgan.
Ukrainalik asirning boshi kesilishi videosi
11-aprel kuni kechki payt Telegram kanallarida ukrainalik harbiyning boshi kesilayotgani aks etgan videolar tarqaldi. Dastlabki videolardan biri Rossiyada ekstremistik deb tan olingan yopiq Telegram kanalida paydo bo‘lgan. So‘ng video Rossiyaning Ukrainaga bosqinini qo‘llab-quvvatlovchi Telegram kanallar va Ukraina ijtimoiy tarmoqlarida ham tarqaldi.
Videoda noma’lum harbiy qo‘liga ukrainalik askarlarga xos sariq tasma bog‘langan erkakning boshini tiriklayin kesib oladi. Qotilning kiyimida uning qaysi tomonga tegishli ekanini bildiruvchi biror belgi ko‘rinmagan. Kadr ortida bir kishi: “Uni qopga solib, komandirga yuboringlar”, deydi.
Ukraina tashqi ishlar vaziri Dmitriy Kuleba videoga munosabat bildirar ekan, “Rossiya ISHIDdan ham battar” ekanini ta’kidladi. Ukraina rahbari Vladimir Zelenskiy esa dunyo rahbarlariga video bo‘yicha munosabat berishga chaqirdi.
“Hamma narsa uchun huquqiy javobgarlik bo‘ladi. Terrorni yengish kerak. Agar rahbarlar munosabat bildirmasa, odamlar tushunib yetmaydi. Hozir harakatni boshlash kerak! Biz Ukrainadagilar esa frontga maksimal darajada to‘planishimiz kerak. Maksimal yordam kerak”, — degan u.
Rossiya prezidenti matbuot kotibi Dmitriy Peskov ham videoga munosabat bildirgan. U videoni tekshirish kerakligini va bu dahshatli kadr ekanini ta’kidlagan.
Izoh (0)