Rossiya va Ukraina ijtimoiy tarmoqlarida rossiyalik ekani aytilayotgan harbiylar ukrainalik askarni shafqatsizlarcha o‘ldirgani tasvirlangan video tarqaldi.
Ukraina xavfsizlik xizmati ma’lum qilishicha, videoda ukrainalik harbiy Rossiya armiyasi jangchilari tomonidan qiynoqqa solingani va o‘ldirilgani tasvirlangan. UXX qasddan odam o‘ldirish bilan urush qonunlari va an’analarini buzish (Ukraina Jinoyat kodeksining 438-moddasi 2-qismi) moddasi bo‘yicha tergovga qadar tekshiruv boshladi.
“Biz bu vahshiylarni topamiz. Kerak bo‘lsa, yerning tagidan ham tortib olamiz. Ular qilgan ishi uchun albatta jazolanadi”, — deya izoh berdi UXX rahbari Vasil Malyuk.
Ukraina tashqi ishlar vaziri Dmitriy Kuleba videoga munosabat bildirar ekan, “Rossiya ISHIDdan ham battar” dedi.
“ISHIDdan ham battar Rossiyaning Birlashgan Millatlar Tashkiloti Xavfsizlik kengashiga raislik qilayotgani bema’nilik. Rossiyalik terrorchilar Ukraina va BMTdan chiqarib yuborilishi hamda jinoyatlari uchun javobgarlikka tortilishi kerak”, — deb yozdi u Twitter’dagi sahifasida.
Ukraina prezidenti Vladimir Zelenskiy dunyo yetakchilarini ushbu videoga javob qaytarishga va Kiyevga Moskvaga qarshi turishda yordam berishga chaqirdi: “Hamma munosabat bildirishi kerak. Har bir rahbar. Vaqt o‘tishini, (bu voqea) unutilishini kutmang. Biz hech narsani unutmaymiz. Va qotillarni kechirmaymiz. Hamma narsa uchun huquqiy javobgarlik bo‘ladi. Terrorni yengish kerak. Agar rahbarlar munosabat bildirmasa, odamlar tushunib yetmaydi. Hozir harakatni boshlash kerak! Biz Ukrainadagilar esa frontga maksimal darajada to‘planishimiz kerak. Maksimal yordam kerak”.
Rossiya rasmiylari ham Mudofaa vazirligi ham videoga izoh bermadi. “Agentstvo” xabariga ko‘ra, ayrim rossiyaparast Telegram kanallarida videoni ma’qullovchi reaksiyalar bildirilgan.
Bu Ukrainadagi urushda boshi kesilgan harbiy xizmatchilarning birinchi videosi emas
CNN telekanali 8-aprel kuni rossiyaparast kanallarda tarqalgan va unda askarlarning boshi kesilgan yana bir videoga e’tibor qaratdi. Post mualliflarining ta’kidlashicha, video Donetsk viloyatidagi Baxmut shahri yaqinida “Vagner” yollanma askarlari tomonidan tasvirga olingan.
Kadrlarda majaqlangan harbiy mashina yonida ukrainalik harbiy xizmatchilar ekani aytilayotgan ikki nafar boshsiz jasad yotganini ko‘rish mumkin. Kadr ortidagi odamlar rus tilida harbiy mashina minaga borib urilgani haqida gaplashgan. CNN qayd etishicha, videodagi jasadlarning qo‘llari ham kesilgan. Harbiylarning tanasini kim nimtalagani noma’lum.
10-aprel kuni Ukrainaning “UNIAN” nashri, shuningdek, metall simga o‘rnatilgan odam boshi suratlari tarqalganini xabar berdi. Bir kun avval suratni urush tarafdori bo‘lgan Rossiyaning “Military Z” jamoatchiligi eʼlon qilgan, unda surat Baxmutda olingani va undagi bosh Ukraina Qurolli kuchlari askariga tegishli ekani aytilgan. Fotosuratning haqiqiyligi mustaqil manbalar tomonidan tasdiqlanmagan.
Izoh (0)