11-aprel kuni kechqurun ijtimoiy tarmoqlarda, taxminlarga ko‘ra, rossiyalik harbiylar ukrainalik askarni shafqatsizlarcha o‘ldirgani tasvirlangan video tarqaldi.
The Insider nashrining yozishicha, dastlabki videolardan biri Rossiyada ekstrimistik deb tan olingan yopiq Telegram kanalida paydo bo‘lgan. So‘ng video Rossiyaning Ukrainaga bosqinini qo‘llab-quvvatlovchi Telegram kanallar va Ukraina ijtimoiy tarmoqlarida ham tarqaldi.
Video qahramonlarining shaxsi, video qachon, qayerda va kim tomonidan yozib olingani aniq emas. Videodagi yashil o‘t-o‘lanlar uning 2022-yil yozida suratga olinganidan dalolat beradi. Videoning haqiqiyligi tasdiqlanmagan.
Videoda noma’lum harbiy qo‘liga ukrainalik askarlarga xos sariq tasma bog‘langan erkakning boshini tiriklayin kesib oladi. Qotilning kiyimida uning qaysi tomonga tegishli ekanini bildiruvchi biror belgi ko‘rinmagan. Kadr ortida bir kishi: “Uni qopga solib, komandirga yuboringlar”, deydi.
Shuningdek kadr ortida harbiylarning ratsiyadan gapirayotgani eshitiladi.
Video tarmoqda paydo bo‘lganidan ko‘p o‘tmay, Ukraina prezidenti ofisining rahbari Andrey Yermak o‘zining Telegram kanalida quyidagicha post qoldirdi: “Hamma narsaning javobi, javobgarligi bo‘ladi”. Uning izohi nima haqida ekani aytilmagan. Ukraina matbuoti fikricha, Yermak qotillik haqidagi videoga shunday munosabat bildirgan.
Ukraina va Rossiyaning boshqa rasmiylari hozircha videoga izoh berishmadi. Ukraina Xavfsizlik xizmati video yuzasidan tergov boshlagani xabar qilindi.
Mart oyi boshida ijtimoiy tarmoqlarda ukrainalik harbiy asirning rus askarlari tomonidan otib o‘ldirilishi tasvirlangan video tarqalgandi. Unda qurolsiz ukrainalik askar “Ukrainaga shon-sharaf” deydi. Shundan keyin qator o‘q ovozlari eshitiladi va u yiqiladi. Tasvir qayerda, qachon va kim tomonidan yozib olingani noma’lum. Ukraina Qurolli kuchlari halok bo‘lgan askarning shaxsini tasdiqladi: u Chernigov hududiy mudofaasi jangchisi Aleksandr Matsievskiy edi.
Izoh (0)