Бирлашган Миллатлар Ташкилотининг (БМТ) Украинадаги Инсон ҳуқуқлари мониторинги миссияси украиналик ҳарбий асирнинг боши кесилаётгани акс этган видеога муносабат билдирди.
Миссиянинг таъкидлашича, “бу қонунбузарликлар, бошқалар сингари тегишли тарзда текширилиши ва айбдорлар жавобгарликка тортилиши керак”.
“Видеоларнинг бирида гўёки украиналик ҳарбий асирнинг шафқатсиз қатл этилгани, иккинчисида эса эҳтимол украиналик ҳарбий хизматчиларнинг жасадлари кўрсатилган, афсуски, бу ягона ҳолат эмас. Охирги ҳисоботларда миссия халқаро гуманитар ҳуқуқнинг бир қатор жиддий бузилишларини, жумладан ҳарбий асирларга нисбатан содир этилган ҳолатларни ҳужжатлаштирди”, — дейилади муносабатда.
БМТ Украинада уруш бошланганидан бери ўнлаб ҳарбий асирларнинг қатл этилганини ҳужжатлаштирган. БМТ Инсон ҳуқуқлари бўйича Олий комиссари бошқармаси ҳисоботида 15 нафар украиналик ҳарбий асирнинг Россия қўшинлари томонидан қатл этилиши, улардан тирик қалқон сифатида фойдаланиш, тиббий ёрдам кўрсатилмагани сабабли икки ярадорнинг ўлими, қийноқлар ҳақида сўз боради.
БМТ камида 25 нафар россиялик ҳарбий асирнинг қатл этилгани ҳақида ҳам маълумот олган. Россияга алоқадор қуролли гуруҳларнинг баъзи аъзолари таслим бўлишдан бош тортгандан сўнг украиналик аскарлар томонидан ўлдирилган.
Украиналик асирнинг боши кесилиши видеоси
11 апрель куни кечки пайт Telegram каналларида украиналик ҳарбийнинг боши кесилаётгани акс этган видеолар тарқалди. Дастлабки видеолардан бири Россияда экстремистик деб тан олинган ёпиқ Telegram каналида пайдо бўлган. Сўнг видео Россиянинг Украинага босқинини қўллаб-қувватловчи Telegram каналлар ва Украина ижтимоий тармоқларида ҳам тарқалди.
Видеода номаълум ҳарбий қўлига украиналик аскарларга хос сариқ тасма боғланган эркакнинг бошини тириклайин кесиб олади. Қотилнинг кийимида унинг қайси томонга тегишли эканини билдирувчи бирор белги кўринмаган. Кадр ортида бир киши: “Уни қопга солиб, командирга юборинглар”, дейди.
Украина ташқи ишлар вазири Дмитрий Кулеба видеога муносабат билдирар экан, “Россия ИШИДдан ҳам баттар” эканини таъкидлади. Украина раҳбари Владимир Зеленский эса дунё раҳбарларига видео бўйича муносабат беришга чақирди.
“Ҳамма нарса учун ҳуқуқий жавобгарлик бўлади. Террорни енгиш керак. Агар раҳбарлар муносабат билдирмаса, одамлар тушуниб етмайди. Ҳозир ҳаракатни бошлаш керак! Биз Украинадагилар эса фронтга максимал даражада тўпланишимиз керак. Максимал ёрдам керак”, — деган у.
Россия президенти матбуот котиби Дмитрий Песков ҳам видеога муносабат билдирган. У видеони текшириш кераклигини ва бу даҳшатли кадр эканини таъкидлаган.
Изоҳ (0)