Xitoyning Kobuldagi elchixonasi Afg‘onistondagi mo‘tadil va oqilona boshqaruvni qo‘llab-quvvatlashi haqida bayonot berdi. Bu haqda “Daryo”ning Afg‘onistondagi muxbiri xabar berdi.
Bayonot 12-aprel, chorshanba kuni e’lon qilingan bo‘lib, Xitoyning Afg‘onistondagi mavjud vaziyat bo‘yicha pozitsiyasini tasvirlagan. Xitoy Afg‘onistonning mustaqilligi va suvereniteti, diniy e’tiqodlari va urf-odatlarini hurmat qilishini, hech qachon uning ichki ishlariga aralashmasligini bildirgan.
Shuningdek, Xitoy Afg‘onistondan “ochiq va inklyuziv tuzilmani shakllantirishni, mo‘tadil hamda oqilona ichki va tashqi siyosatni yuritishni, barcha davlatlar, ayniqsa, qo‘shni davlatlar bilan do‘stona almashinuvlarni kutishini” bildirdi.
“Tolibon” Afg‘onistonni egallab olganidan beri bir yarim yildan ko‘proq vaqt o‘tmoqda, hech bir davlat bu guruhni Afg‘oniston hukumati sifatida rasman tan olmagan, garchi ba’zi davlatlar, jumladan, Xitoy ham “Tolibon” elchisini qabul qilgan.
Dunyoning aksariyat davlatlari Afg‘onistonning barcha etnik guruhlari va xalqlarini ifodalovchi inklyuziv hukumatni shakllantirishga alohida e’tibor qaratmoqda. “Tolibon” tanqidchilariga ko‘ra, hozirgi hukumatni bir millat va bir guruh tashkil qiladi. Hozirda “Tolibon” Vazirlar mahkamasi a’zolarining aksariyati pushtunlar va “Tolibon” a’zolari bo‘lib, hech bir hazora yoki shia yo‘q. Mamlakatlar “Tolibon”dan inson huquqlari, xususan, ayollar huquqlarini hurmat qilishini kutmoqda. Ammo guruh hokimiyatni qo‘lga kiritgandan buyon ayollar va qizlarni ta’lim va mehnatdan mahrum qilgan.
Izoh (0)