“O‘ztermiyo‘lyo‘lovchi” poyezd chiptalari chayqovchilar qo‘liga chiqib ketgani bois chiptaxonalarda chipta qolmagani aytilgan xabarlarga munosabat bildirdi.
Qayd etilishicha, mamlakatda an‘anaviy tarzda nishonlanadigan bayramlar, qishki ta‘til, qolaversa, sayyohlik mavsumi mobaynida temiryo‘l transportiga bo‘lgan talab ortmoqda. Temiryo‘l transporti xavfsiz va ishonchliligi bois, yo‘lovchilar jo‘nash muddatidan 1 oy va undan ham oldinroq chiptalarni xarid qilyapti. “Shu bois, bayramlar arafasida chiptalar yetishmasligi ko‘pchilikda noto‘g‘ri tushuncha uyg‘otmoqda”, — deyiladi munosabatda.
“O‘ztemiryo‘lyo‘lovchi” imkoniyatidan kelib chiqib, qo‘shimcha yo‘lovchi poyezdlar, qo‘shimcha vagonlar ham qo‘yilayotganini ma’lum qildi.
“Bugungi kunda poyezd chiptalarini chayqovchilar umuman olib sota olmaydi. Chunki chiptalar yo‘lovchiga shaxsini tasdiqlovchi hujjati asosida yozib beriladi va temiryo‘l vokzallariga kirishda yo‘lovchilarning chiptalari zamonaviy uskunalar bilan tekshiriladi”, — deya ta’kidlanadi xabarda.
Hozirda har kuni yuqori tezlikda harakatlanuvchi 6 ta “Afrosiyob” poyezdining 12 ta qatnovi amalga oshirilmoqda. Respublikaning barcha hududlariga esa 30 ga yaqin yo‘lovchi poyezdlar qatnovi yo‘lga qo‘yilgan. Temiryo‘l transporti orqali bir sutkada 25 mingdan ziyod yo‘lovchi o‘z manziliga yetkaziladi.
Yo‘lovchilarga chipta xarid qilishda qulayliklar yaratish maqsadida chiptalarning elektron tarzda sotuvi yo‘lga qo‘yilgan. Chiptalarni “uzrailwaytickets” ilovasi hamda “Chipta.railway.uz” sayti orqali 45 kun oldindan yo‘lovchilar xarid qilib olishlari mumkin.
Eslatib o‘tamiz, Navro‘z bayrami kunlari ham yo‘lovchilarni tashish maqsadida Toshkent—Andijon—Toshkent yo‘nalishida qo‘shimcha 4 ta reys harakati yo‘lga qo‘yilgandi. Yo‘lovchilarni tashish maqsadida 6, 13, 20, 27-aprel kunlari 60/59-sonli Toshkent—Andijon—Toshkent yo‘nalishida qo‘shimcha 4 ta reys harakati yo‘lga qo‘yildi.
Izoh (0)